Apat saldarynan Almaty oblysynyń 463 aýlasy birneshe táýlikke jaryqsyz qaldy
ASTANA. Shildeniń 24-i. QazAqparat - Almaty oblysynyń «Úshtóbe-Kópbirlik» avtojolynda taıaýda úzilgen elektr jelilerin qalpyna keltirý jumystary aıaqtaldy, dep habarlady QR Tótenshe jaǵdaılar mınıstrliginiń baspasóz qyzmetinen.
Esterińizge sala keteıik, Almaty oblysy Qaratal aýdanynda elektr taratý jelileriniń úzilýi saldarynan 5 aýyldyń turǵyndary jaryqsyz qalǵan bolatyn. Tótenshe jaǵdaılar mınıstrliginen málim etkendeı, shildeniń 21-i kúni túste, Úshtóbe-Kópbirlik avtojolynyń 65-shi shaqyrymynda qýaty 110 kV-tyq elektr taratý jelileri úzilip, baǵanalary qulaǵan. Sonyń saldarynan Qańbaqty aýyldyq okrýgine qarasty: Aqjar aýylynyń - 83, Aqıyqtyń - 14, Almalynyń - 149, Dóńshiniń 41 úıi men Qyzylbalyq aýyldyq okrýgi Kópbirlik aýylynyń 176 tutynýshysy elektr jaryǵynsyz qalǵan edi.
Shildeniń 23-i kúngi saǵat 22:20-daǵy málimetter boıynsha, elektrmen jabdyqtaý tolyǵymen qalpyna keltirildi.
