Apat kezinde halyq nege sýdy uzaq kútedi — Qyzylorda sý júıesi túsindirdi
QYZYLORDA. KAZINFORM — Ótken aptadaǵy aptap ystyq Qyzylorda qalasynyń kommýnaldyq qyzmeti qaı deńgeıde ekenin kórsetti. Onyń ishinde tirshilik nárine suranystyń artýy bul salanyń jumysyna syn bolǵany ras.
«Qyzylorda sý júıesi» MKK dırektory Jasulan Abatovtyń aıtýynsha, 13-19 shilde aralyǵynda qala halqy táýligine 104 myń tekshe metrge deıin sý tutynǵan.
— Bir aptada qala turǵyndarynan dıspetcherlik qyzmet pen 109 nómirli biryńǵaı baılanys ortalyǵyna 120 ótinish túsken. Onyń 84-i aýyzsý, 36-sy kárizsý júıesine qatysty. Mekemede kúndelikti tańǵy saǵat 8:00-den keshki saǵat 18:00-ge deıin 5 brıgada qyzmet kórsetedi. Odan bólek apatqa baılanysty dıspetcherlik qyzmet úzilissiz ótinish qabyldaıdy. Degenmen, biz algorıtmge sáıkes magıstraldy qubyrdaǵy aqaýdy qalpyna keltirýge basymdyq beremiz, — dedi mekeme dırektory Jasulan Abatov.
Bir aptada elektr energııasynyń úzilýi sebepti 6 magıstraldy jelide aqaý anyqtalǵan. Jumysshylar rezervti dızeldi qondyrǵylardyń kómegimen aqaýdy 15 mınýt ishinde qalpyna keltirgenimen aýyzsýdyń tolyq berilýi 45 mınýtqa deıin ýaqyt alady. Osy aralyqta jelide qysym tómendeıdi. Al sý qubyrlary men rezervýarlaryn qaıtadan toltyrýǵa biraz ýaqyt kerek. Halyqtyń sýdy uzaq kútetin sebebi osynda eken.
Jaz bastalysymen aýyzsýdy baqsha sýaryp, aýlaǵa sebý úshin paıdalaný jaǵdaıdy jylda kúrdelendiredi.
— Shilde aıynyń basynan beri halyqqa táýligine 92 myń tekshe metr sý taratyp otyrmyz. Bul kórsetkish qys mezgiline qaraǵanda eki ese artyq. Negizi halyq sanyna qaraı ortasha eseppen 50 myń tekshe metr sý jetkilikti. Alaıda keıde jazda sý paıdalaný kórsetkishi 110 myń tekshe metrge deıin jetedi. Tutynýshylarǵa aýyzsýdy ózge maqsatqa paıdalanýǵa múldem bolmaıtynyn túsindirip, reıd uıymdastyryp turamyz, — dedi Jasulan Abatov.
Buǵan deıin biz Qyzylordada kúnniń ysýyna baılanysty elektr energııasyn tutyný kólemi kúrt óskenin jazǵan edik.
