Apaly-sińlili qazaqstandyq jas tennısshiler Frantsııadaǵy týrnırdiń fınalyna deıin jetti
ASTANA. KAZINFORM — Frantsııanyń Týlýza qalasynda jasóspirimder arasynda ITF Juniors J60 týrnıri aıaqtaldy.
Qazaqstandyq jas tennısshiler, apaly-sińlili Tomırıs pen Márııam Nurjan juptyq synda tabysty óner kórsetti.
Qazaqstandyq jup fınalda frantsııalyq Anna Baen — lıtvalyq Kamılle Sılýkaıtemen chempıondyq ataqty sarapqa saldy.
Úsh saǵatqa jýyq ýaqytqa sozylǵan tartysty básekede qazaqstandyqtar 5:7, 6:4, 8:10 esebimen ese jiberdi.
Sýper taı-breıkte Márııam Nurjan jaraqat alyp qaldy. Bul apaly-sińlili tennısshilerdiń jeńiske jetýine kedergi keltirdi.
Eske sala keteıik, budan buryn Indıan-Ýells týrnırinde Elena Rybakınanyń fınalda álemniń 1-raketkasyna jol bergenin jazǵan bolatynbyz.
Sondaı-aq Elena Rybakınanyń Indıan-Ýellsten keıin Maıamı týrnırinde baq synaıtyny habarlandy.
Rybakına men Danılına álemdik reıtıngide rekordtyq kórsetkishke qol jetkizdi.
