AÓSShK-tiń Qazaqstandaǵy Hatshylyǵy jazdyń sońynda Almatydan Astanaǵa kóshiriledi
ASTANA. QazAqparat - Azııadaǵy ózara is-qımyl jáne senim sharalary jónindegi Keńestiń (AÓSShK) Hatshylyǵy bıylǵy jazdyń sońyńda Almatydan Astanaǵa kóshirilip, qyrkúıekte tusaýy kesiledi. Bul týraly búgin Ortalyq kommýnıkatsııalar qyzmetinde ótken brıfıngte QR Syrtqy ister mınıstriniń orynbasary Erjan Ashyqbaev aıtty.
«AÓSShK-tiń Qazaqstandaǵy Hatshylyǵy jýyq arada Almatydan Astanaǵa kóshiriledi. Biz ony osy jazdyń sońyna qaraı aıaqtaýdy josparlap otyrmyz. Meniń oıymsha, jazǵy demalystarda barlyq kóshi-qon máselelerin sheship, osynda, Astanada qyrkúıek aıynda tusaýkeser ótkizemiz», - dedi ol.
E. Ashyqbaevtyń aıtýynsha, hatshylyqqa jańa jetekshi - qytaılyq dıplomat taǵaıyndalǵan. Ol Astanada ótetin hatshylyqtyń arnaıy sessııasyna qatysyp, QHR óziniń AÓSShK-ke tóraǵalyǵy barysynda júzege asyrýdy josparlap otyrǵan basymdyqtar baǵdarlamasymen tanysady.
Aıta keteıik, 20-21 mamyrda Shanhaı qalasynda ótken 4-shi Sammıt kezinde Azııa keńesine Katar men Bangladesh tolyqqandy múshe bolyp qabyldandy. Osylaısha atalmysh forýmǵa múshe memleketter pen halyqaralyq uıymdardyń sany 47-ge jetti. Forým kólemi jaǵynan Azııa qurlyǵynyń 90 paıyzǵa jýyǵyn, sher shary halqynyń jartysyna taıaýyn, ıaǵnı 3 mlrd-tan astam adamdy qamtydy.
