AOK Úılestirý komıtetiniń sheteldik delegattary Qysqy Azııa oıyndary úshin Astanada salynyp jatqan nysandarmen tanysty
sp;ASTANA. Jeltoqsannyń 11-i. QazAqparat /Gúlmıra Álıakparova/ - Azııa úshin Astana qysqy sport oıyndarynyń ortalyǵyna aınalýda. Bul týraly búgin 2011 jylǵy qysqy Azııa oıyndaryn ótkizý úshin Astana qalasynda boı kóterip jatqan birqatar sport nysandarynyń qurylys barysymen tanysqan Azııa Olımpıadalyq keńesi (AOK) Úılestirý komıtetiniń qurmetti vıtse-prezıdenti Veı Djıjong aıtty,
dep habarlaıdy QazAqparat.
Qysqy Azııa oıyndaryna daıyndyq barysymen tanysý úshin Astanaǵa arnaıy atbasyn tiregen Azııa Olımpıadalyq keńesi Úılestirý komıtetiniń sheteldik delegattary, elordada azııadalyq oıyndardyń jekelegen túrlerin ótkizý josparlanǵan - 8 myń orynǵa arnalǵan «Respýblıkalyq velotrekti», 10 myń oryndyq «Konkı tebý stadıonyn», 4500 oryndyq «Qazaqstan» sport keshenin aralap kórdi. Sheteldik delegattar sondaı-aq ústimizdegi jyly ashylǵan 30 myń kórermenge laıyqtalǵan «Jabyq stadıonda» bolyp, onyń qurylymymen tanysty.
«Búginde barlyq baǵdarlamalar bekitildi. Azııa oıyndary úshin salyna bastaǵan nysandardyń barlyǵy oıyndarǵa qatystyrylatyndyǵy da rastaldy. Búgin Astanada ótken AOK Úılestirý komıtetiniń otyrysynan keıin uıymdastyrý komıteti qarqyndy qadamdarmen jumys isteıtin bolady», - dedi V.Djıjong jýrnalısterge bergen suhbatynda.
«Konkı tebý stadıonyna» jeke toqtalǵan V.Djıjong, qysqy oıyndar úshin salynyp jatqan bul nysan ámbebap ekendigin jáne ony oıyndardyń tek qysqy túrleri úshin ǵana emes, sondaı-aq Qazaqstan chempıonattarynyń barlyq jazǵy oıyndarynda qoldanýǵa bolatyndyǵyn atap ótti.
«Azııa oıyndary úshin bul nysan tek 10 kúnge ǵana kerek, al qazaqstandyqtar úshin - ómir boıy. Azııa úshin Astana qysqy sport oıyndarynyń ortalyǵyna aınalýda. Olımpıadalyq oıyndardyń da ortalyǵyna aınalýy ǵajap emes», - dedi ol.
