AÓK-tiń turaqty damý qarqyny memlekettik qoldaý sharalarynyń tıimdiligin kórsetedi

ASTANA. KAZINFORM — Prezıdenttiń «Ádiletti Qazaqstan: zań men tártip, ekonomıkalyq ósim, qoǵamdyq optımızm» Joldaýyn jáne Memleket basshysynyń ózge de tapsyrmalaryn júzege asyrý aıasynda elimizde agroónerkásip keshenin damytý boıynsha jumystar júrgizilip jatyr.

Qabyldanyp jatqan sharalardyń nátıjesinde agroónerkásip kesheni turaqty damý qarqynyn kórsetip otyr. Bul memlekettik qoldaý sharalarynyń tıimdiligin jáne Prezıdent tapsyrmalaryn júzege asyrýda Úkimettiń júıeli jumysyn aıǵaqtaıdy. 

2025 jylǵy qańtar–shilde aralyǵynda aýyl sharýashylyǵynyń jalpy ónim kólemi 3,7%-ǵa ósip, 2,4 trln teńgege jetti. Ósim mal sharýashylyǵy men ósimdik sharýashylyǵyndaǵy óndiris kóleminiń artýy esebinen qamtamasyz etildi.

Qaıta óńdeý salasy ozyq damý qarqynyn kórsetip otyr: azyq-túlik ónimderiniń óndirisi 9,2%-ǵa ósip, 2,13 trln teńgeni qurady, sýsyndar óndirisi 6,8%-ǵa (692,4 mlrd teńge) artty. Ósimdik maıynyń óndirisi (+24%), sary maı (+10,4%), shujyq ónimderi (+9%), un óndirisi (+6,6%) ósti.

Aýyl sharýashylyǵynyń negizgi kapıtalyna salynǵan ınvestıtsııalar 442,7 mlrd teńgege (+26,5%) jetti, azyq-túlik ónimderi óndirisine salynǵan ınvestıtsııalar 104,2 mlrd teńgeni (+48%) qurady. Bul resýrstar salany jańǵyrtýǵa jáne zamanaýı tehnologııa engizýge baǵyttaldy.

«Memleket basshysy óziniń halyqqa Joldaýynda tikeleı sýbsıdııalaýdan qoljetimdi nesıeleýge kóshýdiń jáne kommertsııalyq bankterdiń qarajatyn tartýdyń mańyzyn atap ótti. Osynyń nátıjesinde 2024 jyldan bastap jyldyq stavkasy 5%-dan aspaıtyn jeńildetilgen nesıe berý baǵdarlamasy iske qosyldy. Bul bıýdjet pen jeke qarajat kózderiniń resýrstaryn biriktirý arqyly múmkin boldy», — dep atap ótti QR aýyl sharýashylyǵy mınıstri Aıdarbek Saparov.

Aıta keteıik, agrosýbsıdııany maqsatqa saı paıdalaný tetigine baqylaý kúsheıedi.