AÓK-ti tsıfrlandyrý: Biryńǵaı «E-APK» platformasy engiziledi
ASTANA. KAZINFORM – Elimizdegi agroónerkásiptik keshendi tsıfrlandyrýdyń sońǵy kezeńi — biryńǵaı tsıfrlyq ekojúıeni qurýdy kózdeıtin «E-APK» platformasyn engizý. Bul týraly Úkimet otyrysynda AShM basshysy Aıdarbek Saparov aıtty.
— Agroónerkásiptik keshendi tsıfrlandyrýdyń sońǵy kezeńi — biryńǵaı tsıfrlyq ekojúıeni qurýdy kózdeıtin «E-APK» platformasyn engizý. Biryńǵaı platforma sheńberinde agroónerkásip keshenindegi barlyq Aqparattyq júıeni biriktirý josparlanyp otyr. Biryńǵaı tsıfrlyq platformany qurý aýyl sharýashylyǵy jerlerin basqarý, sýbsıdııalaý, ósimdik sharýashylyǵy men mal sharýashylyǵy júıesiniń ózara baılanysy arqyly qadaǵalaýdyń tolyq tsıklin qamtamasyz etedi, - dedi mınıstr.
Onyń aıtýynsha, búgingi tańda agrarlyq sektordy tsıfrlandyrý tórt aqparattyq júıeni qamtıdy, olar:
• Aýyl sharýashylyǵy janýarlaryn birdeılendirý júıesi (ISJ);
• «E-Agriculture» agroónerkásiptik keshen salalaryn basqarýdyń biryńǵaı avtomattandyrylǵan júıesi (EASÝ);
• Sýbsıdııalaýdyń biryńǵaı memlekettik aqparattyq júıesi (GISS);
• «Aýyl Amanaty» halyqqa kredıt berýdiń aqparattyq júıesi.
Budan bólek, ósimdik sharýashylyǵynda da aqparattyq júıe ázirlenip jatyr.
Aıta keteıik, elimizde bıdaı egý azaıyp, rentabeldiligi joǵary daqyldar aýmaǵy artady.
Sondaı-aq aýyl sharýashylyǵy kásipkerlerine jeńildetilgen lızıngke qarjy bólý qashan bastalatynyn jazǵan edik.