AÓK sýbektilerin qarjylaı saýyqtyrý 500 mlrd. teńgege deıin ulǵaıtylady
AÓK salasyndaǵy máseleli nesıelerdiń kólemin azaıtý, olardyń nesıelik salmaǵyn tómendetý men bankrottyqqa ushyraý qaýpin barynsha tómendetý maqsatynda 2013 jyldan bastap QR Aýyl sharýashylyǵy mınıstrligi AÓK sýbektilerin qarjylyq saýyqtyrýdy júrgizýde, dep habarlaıdy vedomstvonyń baspasóz qyzmeti.
2015 jyly qarjylyq saýyqtyrýdy jalǵastyrý úshin Mınıstrlikpen «Agrobıznes-2020» baǵdarlamasyna tıisti ózgerister engizilip, AÓK sýbektileriniń kredıttik jáne lızıngtik mindettemelerin saýyqtyrý somasyn 500 mlrd. teńgege deıin ulǵaıtý boıynsha jumys júrgizilýde.
Baǵdarlamanyń negizgi kórsetkishi jalpy bereshek somasy 300 mlrd. teńgege qaıtarý merzimin uzartý jáne AÓK sýbektileriniń kredıttik jáne lızıngtik mindettemeleriniń protsenttik stavkasyn azaıtý bolyp tabylady. Búginde bul kórsetkish tolyq oryndalǵan.
Osy sharany 2013-2014 jyldary júzege asyrý qorytyndysy boıynsha jalpy bereshek somasy 312,9 mlrd. teńgege 292 AÓK sýbektileriniń ótinimderi maquldandy. Baǵdarlamaǵa iri agroqurylymdarmen qatar shaǵyn jáne orta agrobıznes ókilderi de qatysty. Saýyqtyrýǵa barlyǵy 17 qarjylyq ınstıtýt qatysýda, atap aıtqanda: «TsesnaBank» AQ, «BanktsentrKredıt» AQ, «Qazaqstan Halyq Banki» AQ, «Eýrazııalyq Bank» AQ, «Delta Bank» AQ, «AsiaCreditBank» AQ, «Bank «Astana-Fınans» AQ, «Kazınvestbank» AQ, «BankRBK» AQ, «Sberbank» AQ, «ATFBank» AQ jáne t.b. Saýyqtyrýǵa eń kóp astyq egýshi aımaqtardyń AÓK sýbektileri qatysýda.
Saýyqtyrýǵa jatatyn bereshekterdiń negizgi úlesi ósimdik sharýashylyǵy salasyna 86,4 % tıesili, mal sharýashylyǵy salasyna - 2,8%, aýylsharýashylyǵy ónimderin qaıta óńdeýshilerge - 5%, basqa qyzmet túrlerine - 5,6 %.
Ekinshi deńgeıli bankterden nemese basqa qarjylyq ınstıtýttardan alǵan nesıelerdi qandaı da bir sebepterge baılanysty tóleı almaǵan aýyl sharýashylyǵy taýar óndirýshilerdi qarjylaı saýyqtyrý prıntsıpi kelesideı. «QazAgro» Holdıngi máseleli zaımdar boıynsha syıaqy paıyzyn teńgemen jyldyq 3 %-dan artyq emes kóleminde ornatady. Osy ornalastyrylǵan qarajattyń memleketpen sýbsıdııa túrinde 7 % qaıtarylady. Qarjylyq saýyqtyrý sheńberinde nesıelerdiń qaıtarý merzimi 9 jylǵa deıin uzartylyp, aıyppul men tólemaqy ósimderi esepten shyǵarylady.
Jalpy AÓK sýbektileriniń bereshekteri boıynsha qarjylaı saýyqtyrý baǵdarlamasynda syıaqy mólsherlemesiniń jalpy somasyn eki esege tómendetý, 25 myńnan astam turaqty jumys orynyn saqtap qalý úshin jaǵdaı jasalynyp otyr. Munymen birge, esepten shyǵarylǵan aıyppul men ósim aqylarynyń kólemi shamamen 2,8 mlrd. teńgeni quraıdy.
Jalpy, Mınıstrlikpen júrgizilip otyrǵan shara óziniń ekonomıkalyq maqsattylyǵy men ony ári qaraı júzege asyrý qajettiligin kórsetti, ol AÓK sýbektileri, sondaı-aq qarjy ınstıtýttarynyń tarapynan týdyryp otyrǵan qyzyǵýshylyqpen aıqyndalýda.
Sonymen qatar, 2013-2014 jyldar ishinde bir qatar sebepter boıynsha barlyq AÓK sýbektileri qatysa almady.
Buǵan qosa, reseılik rýbldiń qunsyzdaný esebinen qazaqstandyq taýarlardyń baǵalyq básekege qabilettiliginiń álsireýi AShTÓ-ni qoldaýǵa baǵyttalǵan sharalardy qajet etedi, sonyń ishinde AÓK sýbektilerin qarjylyq saýyqtyrý bar.
