AÓK salasyndaǵy memlekettik saıasat aýyldy damytý máselelerin sheshýge kómektesedi – sarapshy pikiri
«Qazaqstan Prezıdenti Q.K. Toqaev Qazaqstan halqyna arnalǵan kezekti joldaýyn jarııa ete otyryp, elimizdi jaılaǵan koronavırýs indetine qarsy kúresken dárigerlerge, quqyq qorǵaý organdarynyń qyzmetkerlerine, áskerı qyzmetshilerge, eriktilerge, kásipkerlerge jáne osy jaǵdaıǵa beı-jaı qaramaǵan barlyq azamatqa shyn júrekten alǵys bildirdi. Daǵdarystan sabaq alyp, qatelikterdi eskere otyryp, damýǵa serpilis alǵan elder qatarynda bolý úshin reformalar júıeli júrgizilýi kerek. Naqty aıtqanda, memlekettik basqarýǵa, kadr saıasatyna, sheshim qabyldaý júıesine jáne olardy júzege asyrýǵa jaýapkershilikke degen kózqarasty ózgertýden bastaý kerek», - deıdi sarapshy QazAqparat tilshisine bergen suhbatynda.
Koronavırýs pandemııasy kezinde elder arasyndaǵy shekaralardyń jabylýy, ekonomıkalyq alys-beristiń úzilýi elimizdiń eksporttyq taýarlarǵa, ásirese azyq-túlike muqtajdyǵyn kórsetti. Osyǵan qatysty Prezıdent el turǵyndaryn áleýmettik mańyzy bar azyq-túlik taýarlarymen ózin-ózi qamtamasyz etý, mıllıondaǵan aýyl turǵyndarynyń kiristeriniń turaqty ósýi, eńbek ónimdiliginiń 2,5 ese artýy, aýylsharýashylyq ónimderiniń eksportyn eki esege arttyrý úshin kelesi bes jyldyqqa arnalǵan AÓK damytýdyń jańa jobasyn daıyndaýdy tapsyrdy.
«Aýyl sharýashylyǵyna memlekettik qoldaý kórsetý álemniń kóptegen elderine tán. Alaıda, onyń ártúrli formalary men maqsattary bar, mysaly, ekonomıkasy joǵary damyǵan memleketter ulttyq azyq-túlik taýarlarynyń básekege qabilettiligin jáne aýyldardy damytýdyń turaqtylyǵyn saqtaýǵa tyrysady. ıAǵnı, kelip túsken granttar, sýbsıdııalar men jeńildikter naryqtyq ózin-ózi retteý qajetti tıimdilikti qamtamasyz ete almaıtyn máselelerdi sheshedi. Al biz sekildi ótpeli ekonomıkasy bar elderde aýyl sharýashylyǵyna kózqaras basqasha. Munda óndiristi qaıta qurý jáne turǵyndardy qoljetimdi azyq-túlikpen jetkilikti túrde qamtamasyz etý qarastyrylady. Elimizdegi aýyl turǵyndarynyń sany – 7,5 mln, ıaǵnı jalpy halyq sanynyń 47% astamyn qamtıtynyn eskeretin bolsaq, bul bir jaǵynan ulttyq qaýipsizdik máselesi bolyp tabylady», - deıdi A. Arzyqulov.
Osy rette AÓK damytýdyń jańa jobasynda halyqty aýylsharýashylyq shıkizatyn qaıta óńdeý jańa keshendi baǵdarlama negizinde damytýdy, onyń ishinde Qazaqstannyń ár aımaǵynyń ózindik ereksheligin eskerý qajet. ıAǵnı astyq daqyldary men mal sharýashylyǵy boıynsha soltústik oblystar mamandansa, ońtústik oblystarda aýylsharýashylyq daqyldarynyń alýan túrin (dándi, maıly daqyldar, jemis-jıdek daqyldary, kókónister, maqta) eskergen durys. Bul shaǵyn jáne orta bıznes arqyly jumys oryndaryn qurýǵa jáne eldiń eksporttyq áleýetin damytýǵa da jaǵdaı jasaıdy.
Agroónerkásiptik keshendi jetildirý men modernızatsııalaýdyń negizgi sharalaryn jańǵyrtý úshin memlekettik jáne jeke qarajattardy tartý qajet. Innovatsııalardy engizý ıaǵnı óndiristik qýatty arttyrý, ónimniń ózindik qunyn tómendetý, ónimniń materıaldyq shyǵyndaryn birtindep únemdeý kezeń-kezeńimen júrgizilýi kerek.
«Sondaı-aq, aýylsharýashylyǵyn damytýdaǵy gorızontaldi kooperatsııa áleýetin de esten shyǵarmaǵan jón. Onsyz agroónerkásip kesheninde qarqyndy damý bolmaıdy. Kooperatsııa sharýashylyqtarǵa shıkizat satyp alý, ónim óndirý jáne ony satýdy uıymdastyrýda kúsh jumyldyrýǵa múmkindik beredi. Sonymen birge, aýylsharýashylyǵyndaǵy negizgi qıyndyqtardyń biri kólik ınfraqurylymyn damytý, ıaǵnı sharýashylyqqa qajetti tehnıkamen qamtamasyz etý. Ókinishke qaraı, elimizdegi sharýashylyqtardyń basym bóliginde qajetti tehnıkany satyp alýǵa qarjylaı múmkindik joq. Sondyqtan, bul jaǵdaıdan shyǵýdyń joly retinde kooperatıvter nemese mashına-traktor stantsııalary úlgisindegi arnaıy mekemeler uıymdastyrýdy qarastyrýǵa bolady. Sondyqtan, sýbsıdııa jáne salyq jeńildikterin berý baǵdarlamalary aıasynda aýyldyq jerlerdegi kooperatsııany yntalandyrý úshin tıisti sharalar toptamasyn ázirleý qajet», - dedi A. Arzyqulov.
Sarapshy aýyldy damytý problemalaryn sheshýdiń agroónerkásiptik keshen salasyndaǵy memlekettik saıasat tıimdiligine baılanysty ekenin jetkizdi.
«Sondyqtan, qazaqstandyq aýyl aımaqtarynyń bolashaǵy, áleýmettik saıasat strategııasy jáne aýyldaǵy ınfraqurylymdy damytý máselelerine erekshe nazar aýdarý qajet», - deıdi Almas Arzyqulov.
