AÓK salasynda 57 iri joba iske qosyldy

NUR-SULTAN. QazAqparat – 2020 jyly agroónerkásip kesheni salasynda 57 iri joba iske qosyldy. Bul týraly halyqqa esep berý kezdesýinde QR Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

«Agrarlyq nesıe korporatsııasy, Aýyl sharýashylyǵyn qarjylaı qoldaý qory jáne QazAgroQarjy arqyly agroónerkásip keshenin qarjylandyrý kólemi 2020 jyldyń qorytyndylary boıynsha 446 mlrd teńgeni qurady. Bul rette qaryz alýshylardyń sany 2019 jylǵy 77 myńnan 2020 jyly 80 myńǵa deıin ulǵaıdy. Shaǵyn jáne orta bızneske kredıt berý úlesi 92 paıyzdan 95,3 paıyzǵa deıin ósti. 57 iri joba iske qosyldy. Aýylda 15 myńǵa jýyq jumys orny quryldy», - dedi Saparhan Omarov.

Onyń atap ótýinshe, agroónerkásip kesheni sýbektileri úshin jetkilikti kepildik bazasy bolmaǵan jaǵdaıda, ekinshi deńgeıdegi bankterdiń kredıtterine kepildik berýdiń jańa tetigi qoljetimdi boldy. Ol Aýyl sharýashylyǵyn qarjylaı qoldaý qory arqyly iske asyrylady.

«Qaryzdarǵa kepildik berý quraly agroónerkásip kesheni sýbektilerine bankke qajetti kepilmen qamtamasyz etý somasynyń nebári 15 paıyzynan 50 paıyzǵa deıin kepil berýine múmkindik ashty. Qalǵanyna memleket kepildik beredi», - dedi mınıstr.