AÓK salasynda 300 mlrd teńgeniń qujaty rásimdeldi - AEF

ASTANA. QazAqparat - Búgin Global Challenges Summit 2018 forýmy barysynda agro-ónerkásip kesheni salasynda jalpy somasy 300 mlrd teńgeni quraıtyn jobalardy júzege asyrýdy kózdeıtin qujatqa qol qoıyldy. Bul týraly QR Aýyl sharýashylyǵy vıtse-mınıstri Rústem Qurmanov aıtty, dep habarlaıdy QazAqparat tilshisi.

«Búgin biz úshin mańyzdy kúnniń biri boldy. Biz ınvestıtsııa tartý boıynsha jumys júrgizip jatyrmyz jáne naryqta óz segmentiniń úzdik ınvestorlarynyń biri sanalatyn iri sheteldik ınvestorlarmen birqatar jol kartasyna jáne memorandýmǵa qol qoıdyq. Olardyń ishinde et óndirisi, sút ónimderi óndirisi, aýyl sharýashylyǵy tehnıkalaryn qurastyrý syndy jobalar bar. Mundaı qujattardyń jalpy sany - 10. Al bul qujattardyń jalpy quny 300 mlrd teńgeden asyp jyǵylady», - dedi vıtse-mınıstr.

Osy rette, ol forým aıasynda qandaı iri transulttyq kompanııalarmen jol kartasy jasalyp, memorandýmǵa qol qoıylǵanyn aıtty.

«Olardyń qatarynda ıtalııalyq «Cremonini» («Inalca Eurasia Holding»), et ónimderin óndirýmen aınalysatyn ızraıldik «M.A.D. Developing Agricultural Projects», Avstrııanyń jetekshi et óndirýshisi «Cedar Meats» kompanııalarmen  memorandýmǵa qol qoıyldy. Sonymen qatar, táýligine 100 tonna túıe sútin óńdeıtin qytaılyq «Golden Camel GROUP LTD»  kompanııasymen qujatqa qol qoıyldy. Joba júzege asyrylý satysynda», - dedi Rústem Qurmanov.