AOK delegatsııasy elordadaǵy Azıada - 2011 nysandaryn aralady
ASTANA. Qazannyń 26-sy. QazAqparat /Jasulan Amanbaıuly/ - Búgin Astanaǵa issaparmen kelgen Azııa Olımpıada Keńesiniń vıtse-prezıdenti Tımatı Fok elordadaǵy VII Qysqy Azııa oıyndary ótetin nysandardyń qurylysy barysymen tanysty.
Olar Astanada qurylysy aıaqtalyp qalǵan uzyndyǵy 400-metrlik aıdyny bar Muz saraıyna, «Qazaqstan» sport saraıyndaǵy konkı tebý stadıonyna, sol jaǵalaýdaǵy velotrekke jáne oıyndardyń ashylý saltanaty ótetin «Astana»Arena» stadıonyna bas suqty.
«Azıadanyń bastalýyna 100 kúnge jeter-jetpes ýaqyt qaldy. Bul eleýli sharaǵa Qazaqstannyń óte belsendi daıyndyq jasap jatqandyǵyna kózimiz jetip otyr. Qysqy sport oıyndary jańa-jańa damyp kele jatyr, degenmen sizderdiń aıaq alystaryńyz bizdi qatty qýantty»,- deıdi AOK vıtse-prezıdenti T. Fok.
Muz aıdyndary Týrındegi Olımpıada oıyndarynda qoldanylǵan «kilemdik muz» tehnologııasyn engizý arqyly hokkeı alańy retinde qoldanylmaq.
«Qazaqstan Azıada nysandaryn óte qysqa ýaqytta salyp bitirip qalǵanyna tańdanysymyzdy jasyra almaı otyrmyz. Sporttyq keshenderde synaq jarystary qarasha aıynda ótedi. Ol jarystarda AOK baqylaýshylary qatysady»,- dep atap kórsetti T. Fok.
Azııalyq Olımpıada keńesi - qazirgi ýaqytta Azııanyń 45 ulttyq olımpıadalyq komıtetinen turatyn halyqaralyq olımpıadalyq uıym. AOK shtab-páteri Kýveıtte ornalasqan.
2011 jyly Astana jáne Almaty qalalarynda VII qysqy Azııa oıyndaryn daıarlaý jáne ótkizý boıynsha Uıymdastyrý komıteti Kárim Másimovtiń tóraǵalyq etýimen Azııa oıyndarynyń jalpy jarystar baǵdarlamasy maquldandy.
Azıada baǵdarlamasy boıynsha 69 medaldar jıyntyǵy oınalatyn sporttyń 11 túri boıynsha jarystar ótkiziledi. Oıyndar ótkizý qarsańynda Azııalyq Olımpıada Keńesiniń kezekti Bas Assambleıasy ótedi, oǵan 45 azııa elderiniń sport qozǵalysy basshylary qatysady.
