AÓІSShK Syrtqy ister mınıstrleriniń kezdesýi: Elbasy qatysýshylarǵa úndeý joldady

NUR-SULTAN. QazAqparat – QR Tuńǵysh Prezıdenti – Elbasy Nursultan Nazarbaev elordada ótip jatqan Azııadaǵy ózara is-qımyl jáne senim sharalary keńesi Syrtqy ister mınıstrleriniń 6-kezdesýine qatysýshylarǵa quttyqtaý joldady. Úndeýdi is-shara barysynda QR Syrtqy ister mınıstriniń orynbasary Aqan Rahmetýllın oqyp berdi, dep habarlaıdy QazAqparat tilshisi.

QR Tuńǵysh Prezıdenti quttyqtaýynda keńestiń elderdi saıası jaqyndatýda, Azııadaǵy ortaq ári ınklıýzıvti qaýipsizdik pen turaqtylyqty qamtamasyz etýde biregeı halyqaralyq qurylymǵa aınalǵanyn atap ótedi.

«Forým Azııa aýmaǵynyń 90 paıyzyn qamtıtyn 27 memleketti biriktiredi. Bul jer shary turǵyndarynyń jartysyna teń, álemdik jalpy ishki ónimniń 50 paıyzy óndiriledi jáne jahandyq ekonomıkanyń úshten ekisin qamtamasyz etedi. Azııadaǵy ózara is-qımyl jáne senim sharalary keńesiniń 5 sammıti ótti. Onyń hatshylyǵy, jumys organdary bar. Іskerlik jáne jastar keńesi jumys isteıdi. Jahandyq jáne óńirlik deńgeıde kópjaqty qurylymdarmen baılanys ornatylǵan. Keńestiń BUU Bas assamleıasy janyndaǵy baıqaýshy mártebesi bar. Buǵan qosa, keńestiń bedeli, róli jáne geografııasy artyp kele jatyr», - dep atap ótedi Elbasy.

Nursultan Nazarbaev oǵan keńes jumysyna qatysatyn halyqaralyq jańa uıymdardyń qatarynyń arta túsýi dálel bola alatynyn basa aıtty.

«Azııadaǵy ózara is-qımyl jáne senim sharalary keńesi jumys istep turǵan jyldardyń ishinde tóńiregimizde óte kóp dúnıe ózgerdi. Aıta keterligi, endigi ýaqytta Azııa jahandyq ústemdik pen qyrǵı-qabaq soǵystarǵa qarama-qarsy seriktestik, teń quqyqtyq, ózara yntymaqtastyq qaǵıdattaryn úndeıtin Jer sharynyń mańyzdy saıası ortalyǵyna aınalyp otyr», - dedi QR Tuńǵysh Prezıdenti quttyqtaýynda.