AÓІSShK Ǵulamalar keńesin onyń negizin qalaýshy basqarǵany durys - Qaırat Sarybaı

NUR-SULTAN. QazAqparat – AÓІSShK Ǵulamalar keńesin keńestiń negizgin qalaýshy basqarǵany durys. Mundaı pikirdi Azııadaǵy ózara is-qımyl jáne senim sharalary keńesi hatshylyǵynyń atqarýshy dırektory Qaırat Sarybaı bildirdi, dep habarlaıdy QazAqparat tilshisi.

Aıta keteıik, AÓІSShK Syrtqy ister mınıstrleriniń búgin ótken 6-shy kezdesýi barysynda Ǵulamalar keńesin qurý týraly sheshim qabyldanǵan bolatyn.

Sonymen qatar osy kezdesýde atalǵan keńestiń basshysy laýazymyna QR Tuńǵysh Prezıdenti – Elbasy Nursultan Nazarbaevtyń kandıdatýrasy usynylǵan edi.

BAQ ókilderine suhbat berý barysynda Qaırat Sarybaı Elbasynyń kandıdatýrasyna qatysty pikir bildirip, protsedýra nátıjesi qashan belgili bolatyndyǵy aıta almaıtyndyǵyn jetkizdi.

«Usynys bergen tarap hatshylyqtan merzimin belgileýdi ótinýine baılanysty. Sondyqtan bul kóp ýaqytty ala qoımas. Óıtkeni, pikirtalas barysynda, sóz sóıleýler kezinde kópshilik bul usynysqa qoldaý bildirdi. Menińshe, Ǵulamalar keńesin onyń negizin qalaýshynyń basqarǵanynan artyq aqylǵa qonymdy ári durys sheshim bolmaq emes», - dedi Qaırat Sarybaı.

Esterińizge sala ketsek, QR Tuńǵysh Prezıdenti – Elbasy Nursultan Nazarbaev 1992 jyly Birikken Ulttar Uıymy Bas assambleıasynyń 47-sessııasynda Azııadaǵy ózara is-qımyl jáne senim sharalary keńesin qurý týraly bastama jasaǵan bolatyn.