Ańyzǵa aınalǵan voleıbolshy Janbek Saýrambaev dúnıeden ozdy
ALMATY. QazAqparat - Aty ańyzǵa aınalǵan qazaqstandyq jáne keńestik voleıbolshy, KSRO-nyń jáne QR eńbek sińirgen sport sheberi Janbek Saýrambaev 77 jasynda dúnıe saldy, dep habarlaıdy QazAqparat.
QR Voleıbol federatsııasynyń habarlaýynsha, Saýrambaev 24 qazan kúni qaıtys bolǵan. Janazasy 27 qazan kúni 10:00-12:00 aralyǵynda Balýan Sholaq atyndaǵy Sport saraıynda ótedi. Janbek Saýrambaev almatylyq tanymal «Býrevestnık» klýbynyń kapıtany bolǵan, ol klýb quramynda júrgende Keńes odaǵynyń chempıony (1969) jáne Eýropa chempıondary Kýbogynyń eki dúrkin ıegeri (1970, 1971) bolǵan.
Sonymen birge, Janbek Saýrambaev Eýropa chempıonatynda jeńiske jetken, Álem Kýbogynyń ıegeri bolǵan jáne álem chempıonatynyń qola júldegeri atanǵan KSRO quramasy sapynda oıyn oınaǵan. 1972 jyly oıyndyq mansabyn aıaqtaǵan Janbek Nyǵmetuly tabysty voleıbol bapkeri boldy, Kýveıt pen Qazaqstanda jumys istedi. Alǵash ret Qazaqstan Paralımpıada quramasyn álemdik sport arenasyna alyp shyqty.
Professor Janbek Saýrambaev 40 jyldan astam ómirin pedagogıkalyq qyzmetke arnady, Arhıtektýra-qurylys ınstıtýty men Qazaq polıtehnıkalyq ınstıtýtynda dene tárbıesi kafedrasynyń meńgerýshisi boldy. Sińirgen eńbegi men jetistikteri úshin, Qazaqstan jáne KSRO voleıbolyna qosqan erekshe úlesi úshin Jánibekhan Saýrambaev birneshe ret memlekettik nagradalarmen marapattaldy.
