Ańyz fýtbolshy Seıilda Baıshaqov jaıynda ne bilemiz

ASTANA. QazAqparat - Ańyz fýtbolshy Seıilda Baıshaqov 73-ke qaraǵan shaǵynda ómirden ótti. Ótken ǵasyrdyń 60-80 jyldarynda qazaqstandyq klýbtarda dop tepken fýtbolshynyń sheberligin jankúıerler joǵary baǵalaıdy. QazAqparat tilshisi Seıilda Baıshaqovtyń ómir jolyna úńilip, este qalarlyq derekterge kóz salyp kórgen edi.

Seıilda Baıshaqov 1950 jyly 28 tamyzda sol kezdegi Jambyl qalasynda dúnıege kelgen.

Jastaıynan fýtbolǵa qumar bolyp ósken ol jergilikti bapkerlerden tálim aldy. Alǵashqy jattyqtyrýshysy Evgenıı Petrovıch Rott bolatyn.

Fýtbolshylyq jolynda ortalyq qorǵaýshy pozıtsııasynda oınady. 1966-1967 jyldarda Jambyldyń «Qaırat», 1968-1970 jyldarda «Energetık» klýbtarynda dop tepti.

1969 jyly Seıilda Baıshaqov Qazaq KSR ulttyq quramasyna shaqyrtý aldy. Sol kezeńdegi quramanyń bas bapkeri Borıs Karetnıkov elimizdiń ár aımaǵynan eń jaqsy fýtbolshylardy jınady.

Seıilda Baıshaqov ómirin fýtbolǵa arnady. 1971-1981 jyldar aralyǵynda almatylyq «Qaırattyń» namysyn qorǵady.

1971 jyly komanda quramynda temirjolshylardyń halyqaralyq sport odaǵynyń kýbogyn jeńip aldy.

«Qaırattaǵy» alǵashqy oıynyn 1971 jyldyń 27 naýryzynda Voroshılovgrad qalasynda jergilikti «Zarıa» komandasyna qarsy ótkizdi.

Jattyqtyrýshylar shtaby 20 jastaǵy qorǵaýshyǵa senim artty. Kezdesýde esep ashylmady. Jas qorǵaýshy úshin jaqsy bul úlken tájirıbe mektebi boldy.

Kelesi týrda almatylyq ujym Lenıngradtyń «Zenıt» komandasyn 3:1 esebimen tize búktirdi.

Jas fýtbolshy komandanyń turaqty oıynshysyna aınalyp, odaq baspasóziniń nazaryn ózine aýdartty.

1977 jyly KSRO ulttyq quramasyna shaqyrtý aldy. 1978 jylǵy FIFA Álem kýbogynyń qurama sapynda eki kezdesýde alańǵa shyqty.

Tuńǵysh oıynyn 30 sáýirde Vengrııaǵa qarsy ótkizdi.

«Birinshi taımnyń aıaǵyna deıin derlik biz vengrlerdiń tyqsyrýyna tótep bere aldyq. Biraq úziliske shyǵar kezde alań ıeleri esep ashty. Olardyń kezekti shabýylynyń birinde alystan tepken dopqa qarsy atylǵan Vladımır Astapovskıı sál-pál jańylysyp, qaǵyp jibere almaı qaldy. Dopqa saýsaǵynyń ushy ǵana tıdi. Al Tıbor Nılashı týra sol jerden tabyldy. Ekinshi taımda vengrler taǵy da bir soǵyp ketti. Biz qarsy shabýyl uıymdastyrýǵa tyrystyq, biraq solardyń bireýinde ǵana óz degenimizge jettik», - degen edi ardager fýtbolshy oıyn jaıynda.

Odan keıin Seıilda Baıshaqov Grekııa quramasymen oıynda jasyl alańǵa shyqty.

Eki kezdesýde de ol 90 mınýtty tolyq oınady. 1972 jyly oǵan «KSRO sport sheberi» ataǵy berildi.

1982-1988 jyldary almatylyq «Qaıratta» bapker qyzmetin atqarsa, odan keıin SKIF, RVShSM klýbtarynda jemisti eńbek etti.

2007 jyldan beri Qazaqstan fýtbol federatsııasy vıtse-prezıdenti bolsa, odan keıin federatsııa basshylyǵy tizginin ustady.

Keıingi jyldarda QR ardagerler fýtboly odaǵynyń prezıdenti, Qazaqstan fýtbol federatsııasy prezıdentiniń keńesshisi boldy.

Aıta keteıik, Memleket basshysy 72 jasynda dúnıeden ótken sport ardageri Seıilda Baıshaqovtyń otbasy men jaqyndaryna kóńil aıtty.