Ánuranymyz shyrqalyp, týymyz jelbiregeni - bizdiń mańdaı terimizdiń ótelgeni - Galına Vıshnevskaıa
SAPPORO. QazAqparat - Búgin Japonııanyń Sapporo qalasynda ótip jatqan VІІІ qysqy Azııa oıyndarynyń eki dúrkin chempıony Galına Vıshnevskaıa jeńisinen keıingi áserimen bólisti, dep habarlaıdy Sapporodaǵy QazAqparat tilshisi.
«Búgin jeńiske jetýim óte aýyr boldy. Túnimen jaýǵan jańa qar keri áserin tıgizdi. Al jarys bastalar aldynda kún jarqyrap, kúnge qarsy júgirgende qar kózge shaǵylysty. Eki kún qatarynan jarysqa shyǵý kez-kelgen sportshy úshin óte aýyr. Búgin jarys barysynda atý túrinen azdap qatelikterge boı aldyrdym. Biraq, jyldamdyq jaǵynan ózimnen keıingi oryn alǵan qytaılyq sportshydan basym bolǵanymdy bildim. Ol atý jattyǵýynyń bireýinen múlde qateleskenin baıqadym. Sosyn men barynsha odan asyp túsýdi kózdedim. Aqyry maqsatyma jettim. Qazaqstanǵa bir ózim eki altyn júlde syıladym. Bul - meniń de, elimniń de jeńisi. Eń bastysy Qazaqstannyń Ánuranyn Sapporo tórinde áýelettik. Týymyzdy bıikten jelbirettik. Bul sportshynyń eńbegi men mańdaı teriniń óteýi degen sóz. Ózge sportshylarymyzǵa da sáttilik bolsyn dep tileımin», -dep aǵynan jaryldy Galına Vıshnevskaıa.
Esterińizge sala keteıik, Búgin bıatlonnan iz qýý jarysynan 10 shaqyrym qashyqtyqta altyn medaldi Galına Vıshnevskaıa qanjyǵasyna baılady. Ol keshe bıatlonnyń sprınttik 7,5 shaqyrym jarysta chempıon atanǵan bolatyn.
foto:Іzturǵan Aldaýev
