Ánýar Janǵozın balabaqsha kezeginde óz atynan júzdegen balanyń nelikten tirkelgenin túsindirdi
NUR-SULTAN. QazAqparat - Nur-Sultan qalalyq bilim basqarmasynyń basshysy Ánýar Janǵozın balabaqsha kezegine óz atyna tirkelgen júzdegen balaǵa qatysty túsinikteme berdi, dep habarlaıdy, QazAqparat tilshisi.
«Naqty meniń atyma birneshe júz bala tirkelgen bolatyn. Mundaı jaıt balalardy balabaqshaǵa tirkeýdi qaǵazdan elektrondyq formatqa aýystyrý barysynda oryn alǵan edi», - dedi ol elorda ákimdiginde ótken baspasóz máslıhatynda.
Osy oraıda basqarma basshysy BAQ ókilderiniń «mundaı áreket Qazaqstan zańnamasyna qaıshy emes pe?» degen saýalyna jaýap berdi.
«Bul zańnamanyń eshqandaı normasyna qaıshy emes. Kerisinshe biz ata-analarǵa kómek kórsettik. Sebebi, biz mundaı qadamǵa barmaǵan kezde olar kezekten aıyrylyp qalatyn edi. Al bul durys emes. Elektrondyq formatqa kóshýimizge baılanysty birde-bir ata-ana, birde-bir bala ózderiniń kezektegi ornynan aıyrylmaýy qajet. Sondyqtan osyndaı áreketke bardyq. Ata-analardyń basym bóligi qazirgi ýaqytta balalardy óz attaryna jazdyryp aldy», - dedi Ánýar Janǵozın.
Aıta keteıik, elorda balabaqshalarynda 17 myń oryn bosaıdy. Osy joly balabaqshaǵa joldama alý jańa júıe boıynsha júzege asyrylady.
