Ánýar Nurpeıisov Olımpıadanyń qola júldegeri Denıs Ten týraly vıdeoklıp túsirdi
ASTANA. QazAqparat - Tanymal qazaqstandyq akter, shoýmen, prodıýser jáne ınternet-jobalaýshy Ánýar Nurpeıisov Olımpıadanyń qola júldegeri Denıs Ten týraly «KOTe - bul Denıs» atty vıdeoklıp túsirdi. Óziniń týyndysyn ol VKontaktedegi paraqshasynda jarııalady.
Tına Ternerdiń «Simply the Best» ániniń negizinde jazylǵan óleńdi Nurpeıisov pen Dıana Sharapova (VIA «Negry» toby) oryndaıdy. Shyǵarmanyń sózderin Nurpeıisovtiń ózi jazǵan.
«KOTe» - mýzykalyq-áleýmettik joba. Onda Ánýar tanymal óleńderdi jańa formatta óńdep, ózekti sózdermen árlendirip otyrady. Bunyń aldynda Ánýar osyndaı beıneklıpterdi QR Premer-Mınıstri Serik Ahmetovke, «Shahter» fýtbol klýbyna, olımpıada chempıony Serik Sápıevke jáne kásibı boksshy jáne álem chempıony Gennadıı Golovkınge arnaǵan bolatyn.
Týyndy QR Tuńǵysh Prezıdentiniń Qory stýdııasynda, sonymen qatar Romanoff Production jáne Dalai Lama Art Center dybys jazý ortalyqtarynda óńdeldi.
Denıs Tenge arnalǵan beıneklıp VKontaktede ornalastyrylǵan: https://vk.com/video437077_168251266 .
