Gýterrısh Túrikmenstanda BUU-nyń damýshy elder jónindegi konferentsııasyna qatysady

ASTANA. KAZINFORM — BUU Bas hatshysy Antonıý Gýterrısh Túrikmenstanǵa «Avaza» ulttyq týrıstik aımaǵynda ótip jatqan BUU-nyń teńizge shyǵa almaıtyn damýshy elder jónindegi úshinshi konferentsııasyna qatysý úshin keldi, dep habarlaıdy TDH. 

Túrikmenbashy qalasynyń halyqaralyq áýejaıynda ony túrikmen halqynyń Ulttyq kóshbasshysy, Túrikmenstan Halk Maslahatynyń tóraǵasy Gýrbangýly Berdimuhamedov qarsy aldy. 

BUU Bas hatshysy Antonıý Gýterrısh úılesimdi damý jolymen kele jatqan Túrikmenstandaǵy jalpyadamzattyq mańyzy bar halyqaralyq forýmǵa qatysý ol úshin úlken mártebe ekenin aıtty.

Óz kezeginde Gýrbangýly Berdimuhamedov BUU qamqorlyǵymen joǵary deńgeıdegi konferentsııany uıymdastyrý jáne ótkizý Túrikmenstanǵa jalpy senim votýmy retinde qarastyrylatynyn málimdedi. 

BUU Bas hatshysy Túrikmenstanǵa sapary aıasynda prezıdent Serdar Berdimuhamedovpen resmı kezdesý ótkizedi, onda ekijaqty jáne ózara múddeli halyqaralyq yntymaqtastyq máseleleri talqylanady.

Sondaı-aq BUU Bas hatshysy Antonıý Gýterrısh pen túrikmen halqynyń ulttyq kóshbasshysy, Halk Maslahatynyń tóraǵasy Gýrbangýly Berdimuhamedovtiń kezdesýi josparlanǵan. 

5-8 tamyz aralyǵynda Avazada BUU-nyń teńizge shyǵa almaıtyn damýshy elder jónindegi Úshinshi konferentsııasy ótedi. Konferentsııaǵa kóptegen memlekettiń basshylary, sondaı-aq halyqaralyq uıymdardyń jetekshileri men ókilderi qatysady. Antonıý Gýterrıshtiń osy konferentsııaǵa qatysýy onyń halyqaralyq mańyzyn arttyrady jáne qatysýshy memleketter arasyndaǵy senimdi yntymaqtastyqty nyǵaıtýǵa yqpal etedi. 

Atap ótilgendeı, konferentsııa teńizge shyǵý múmkindigi joq damýshy elderdiń ekonomıkalyq áleýetin arttyrýǵa, saýda-ekonomıkalyq saladaǵy aımaqaralyq jáne halyqaralyq qatynastardy damytýǵa yqpal etedi.

Búǵan deıin Prezıdent Qasym-Jomart Toqaev pen Antonıý Gýterrısh Almaty qalasyndaǵy BUU óńirlik ortalyǵyna barǵanyn jazǵan bolatynbyz.