Antonıý Gýterrısh barsha eldi BUU-ny qoldaýǵa shaqyrady
ASTANA. KAZINFORM – Búgin - halyqaralyq beıbitshilik pen qaýipsizdikti saqtaýǵa, halyqtar arasyndaǵy dostyq qatynastardy damytýǵa, halyqaralyq yntymaqtastyqqa qol jetkizýge jáne memleketterdiń is-áreketterin úılestirý ortalyǵy bolýǵa baǵyttalǵan Birikken Ulttar Uıymy kúni. Osy oraıda, Kazinform BUU Bas hatshysy Antonıý Gýterrıshtiń joldaýyn usynady.
«Birikken Ulttar Uıymyn búkil álem qurdy jáne ol búkil álem úshin quryldy. 1945 jyldan beri ol - elderdiń jahandyq máselelerdiń sheshimin tabý úshin birigetin orny. Bul – shıelenisti basýǵa, kópir ornatyp, beıbitshilikti nyǵaıtýǵa septigin tıgizetin sheshimder. Bul – kedeılikti joıý, turaqty damýǵa yntalandyrý jáne halyqtyń eń osal toptaryn qorǵaý sheshimderi. Bul - qaqtyǵys, zorlyq-zombylyq, ekonomıkalyq qıyndyqtar jáne klımattyq apattar jaǵdaıynda ómir súrip jatqan adamdarǵa ómir úshin qajetti kómek kórsetý sheshimderi. Bul – áıelder men qyzdar úshin ádildik pen teńdik tarazysyn teńestiretin sheshimder. Bul – 1945 jyly elestetý múmkin emes máselelerdi qamtıtyn sheshimder – klımattyń ózgerýi, tsıfrlyq tehnologııalar, jasandy ıntellekt jáne ǵarysh keńistigi.
Qyrkúıek aıynda Bas Assambleıa «Bolashaq úshin» paktini, Jahandyq tsıfrlyq shartty jáne Bolashaq urpaq týraly deklaratsııany qabyldady. Bul mańyzdy kelisimder jınaǵy Birikken Ulttar Uıymy júıesiniń aınalamyzdaǵy ózgerister men syn-qaterlerge saı bolyp, barlyǵy úshin sheshimder shyǵaratyndaı beıimdelýin, reformalanýyn jáne jasarýyn qamtamasyz etýge kómektesedi.
Biraq bizdiń jumysymyz árqashan Birikken Ulttar Uıymynyń Jarǵysynda jáne halyqaralyq quqyq normalarynda bekitilgen qundylyqtar men qaǵıdattarǵa jáne árbir adamnyń qadir-qasıeti men quqyqtaryn qurmetteýge negizdeledi.
Qazirgi qıyn zamanda jalǵyz úmit azdyq etedi. Úmit beıbitshilik, ortaq ál-aýqat pen ǵalamshardyń gúldenýin qamtamasyz etý úshin sheshýshi áreket pen kópjaqty sheshimderdi talap etedi. Úmit barlyq eldiń jumyla áreket etýin talap etedi. Úmit Birikken Ulttar Uıymyn talap etedi.
Birikken Ulttar Uıymy kúni men barlyq eldi búkil álem men ol beıneleıtin ıdealdar úshin baǵdar bolyp otyrǵan osy shamshyraqty jarqyratyp ustaýǵa shaqyramyn», - delingen joldaýda.
Jýyrda Memleket basshysy Qasym-Jomart Toqaev Astanada ótken Astana Think Tank forýmynyń plenarlyq otyrysynda «Birikken Ulttar Uıymyn nyǵaıtý kerek» degen senimde ekenin aıtqan edi. «Óıtkeni onyń ornyn basatyn uıym joq. BUU-da kóptegen kemshilik bolǵanymen, bizde basqa balama joq. Sondyqtan Qazaqstan BUU rólin nyǵaıtý boıynsha osyndaı ustanymdaǵy barlyq elmen yntymaqtasa berýge nıetti», - dedi Prezıdent.
Eske salaıyq, Nıý-Iorktegi BUU Bas Assambleıasy 79-shy sessııasynyń joǵary deńgeıdegi aptalyǵy aıasynda Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý Birikken Ulttar Uıymynyń Bas hatshysy Antonıý Gýterrıshpen kezdesip, QR men BUU yntymaqtastyǵynyń keleshegin talqylaǵan bolatyn.
Aıta ketsek, Uıymǵa «Birikken Ulttar» ataýyn berýdi AQSh Prezıdenti Franklın Delano Rýzvelt usynǵan. Deklaratsııasy San-Frantsıskoda 1945 jyly 24 qazanda qabyldanyp, sol kún BUU kúni dep jarııalanady. Álemdegi eń iri, halyqaralyq deńgeıde usynylǵan jáne eń qýatty úkimetaralyq uıymnyń Bas keńsesi Nıý-Iorkte ornalasqan.
