Antonıo Taıanı Eýroparlament prezıdenti bolyp saılandy
STRASBÝRG. QazAqparat - Eýropalyq halyq partııasy fraktsııasynyń ókili ıtalııalyq Antonıo Taıanı Eýropalyq parlamenttiń (EP) prezıdenti bolyp saılandy, dep habarlaıdy «QazAqparat» HAA-nyń menshikti tilshisi.
Antonıo Taıanıdiń kandıdatýrasyn parlamentarııler Strasbýrgte ótken EP sessııasynyń tórtinshi kezeńinde ǵana basym daýyspen qoldady. Ol Eýroparlamentti aldaǵy 2,5 jyl boıy basqaratyn bolady.
Aıta keteıik, alda ótken daýys berýdiń úsh kezeńinde alty kandıdattyń eshbiri qajetti daýysty jınaı almady. Osy sebepti jeńimpaz tórtinshi kezeń barysynda anyqtaldy, oǵan ózgelermen salystyrǵanda anaǵurlym kóp daýys jınaǵan eki depýtat qana ótti.
Eýroparlament basshysynyń qyzmeti úshin aqtyq dodaǵy Taıanıden bólek, onyń otandasy Sotsıalıster men demokrattardyń progressıvti alıansy fraktsııasynyń basshysy Djannı Pıtella shyqqan bolatyn.
