Antqa degen adaldyq: Aqtóbede áskerıdiń áreketi jurtty tánti etti

NUR-SULTAN. QazAqparat – Áleýmettik jelide jappaı tártipsizdikter barysynda belsendilerdiń óz qyzmetin atqaryp turǵan sarbazdy úgittep jatqany týraly vıdeo tarady. Álgi vıdeoda Ulttyq ulan sarbazynyń úgitke kónbeı, antyna berik bolǵany kórsetilgen. Jurtty tánti etken bul áskerı - QR Ulttyq ulany «Batys» óńirlik qolbasshylyǵy 6655-áskerı bóliminde leıtenant Ulan Myrzabaı, dep habarlaıdy QazAqparat tilshisi.

«Batys» óńirlik qolbasshylyǵy baspasóz qyzmetiniń jetekshisi, podpolkovnık Erbolat Sultanov málim etkendeı, Ulan Myrzabaıǵa qatysty oqıǵa Aqtóbe qalasynda boldy.

Áleýmettik jelide tarap ketken beınejazbany 190 myńǵa jýyq adam qarap, 700-deıi áskerı qyzmetshini qoldap, pikir jazǵan. Anyqtalǵanyndaı, beınejazba 5 qańtar kúni Aqtóbede túsirilgen bolyp shyqty.

Almaty oblysy Qapshaǵaı qalasynyń týmasy Ulan Myrzabaı Ulttyq ulanda 2017 jyldan qyzmet etip keledi eken.

Sol kúni olar zańsyz mıtıngi kezinde Aqtóbe oblysy ákimdigi aldyndaǵy alańda aldyńǵy shepte turǵan.

U.Myrzabaıdyń sózine qaraǵanda, bastapqyda bári tynysh bolǵan. Bular mıtıngige qatysýshylardyń óz talap-tilekterin bildirýine qarsylyq etpegen, qaıta qorǵap turǵan. Alaıda keıbireýleri tártip buza bastaǵan.

«Qoldarynda tas, taıaq, armatýra jáne Molotov kokteıli boldy. Aldyńǵy shepte turǵan maǵan birnesheýi jaqyndap kelip, vıdeoǵa túsirip, meni óz jaqtaryna shyǵýǵa úgittedi. Biraq men buıryqtyń aty buıryq ekendigin aıtyp, áskerı antyma adaldyqtan aınyǵanym joq. Elimiz bizge sendi. Sol senimnen shyǵýdan, Otandy qorǵaýdan artyq abyroı joq», dedi Ulan Myrzabaı.

Eske sala keteıik, budan buryn qaqtyǵys kezinde jaralanǵan jaýyngerdiń shepten shyqpaǵanyn jazǵan bolatynbyz.