Antıvakserlermen jeke kezdesýge daıynmyn – Alekseı Tsoı

NUR-SULTAN. QazAqparat – Densaýlyq saqtaý mınıstri Alekseı Tsoı vaktsına salýǵa qarsy turǵyndar men Sanıtarlyq-epıdemıologııalyq baqylaý komıtetiniń resmı ókili Erjan Baıtanaevtyń arasyndaǵy keleńsiz oqıǵa týraly pikir bildirdi, dep habarlaıdy QazAqparat tilshisi.

Ortalyq kommýnıkatsııalar qyzmetinde BAQ ókilderi Densaýlyq saqtaý mınıstri Alekseı Tsoıǵa antıvakserler men mınıstrlik mamandarynyń arasyndaǵy keleńsiz oqıǵa týraly saýal qoıdy. Áleýmettik jelide birneshe turǵynnyń Sanıtarlyq-epıdemıologııalyq baqylaý komıtetiniń remı ókili Erjan Baıtanaevqa qol kótergeni týraly vıdeo taraǵan bolatyn.

«Antıvakserlermen kezdesýge orynbasarlaryńyz ben resmı ókilderdi jibergenshe nege ózińiz shyqpadyńyz. Olar sizdiń atyńyzdy atap shaqyrdy ǵoı. Eger siz shyqqanda mundaı keleńsizdik bolmas pa edi?» - dep surady jýrnalıst.

«Túsindirý jumystary barlyq satyda júrip jatyr. Vıtse-mınıstrler de, men de halyqpen baılanysqa shyǵyp júrmiz. Sondyqtan, kim bos bolsa sol kezdesedi. Bul jerde eshqandaı suraq bolmaýy kerek. Bizde barlyq mamandar halyqtyń aldyna shyǵyp júr. Kim sol mańaıda bolsa, sol shyǵady. Bos bolǵan mamandar shyqty. Departament dırektorlarynan keıin ol topqa vıtse-mınıstr de shyqty. Sol kezdesýge qatysqan mamandardyń bilim-biligi ol kisilerdiń suraqtaryna jaýap berýge jetedi dep oılaımyn. Negizinen qoıylǵan suraqtyń kóbine oıdaǵydaı jaýap alǵanyn ózderi de aıtqan», - dedi mınıstr.

Mınıstr múmkindik bolsa, antıvakserlermen jeke kezdesýge daıyn ekenin jetkizdi.

«Biz azamattardyń bárine birdeı qaraımyz. Biz úshin árbir Qazaqstan azamatynyń orny birdeı. Múmkindik bolsa, árqashan kezdesemiz. Árqashan kezdesýge daıynbyz. Naqty men jeke kezdesýge daıynmyn», - dedi Alekseı Tsoı.