Antıvakserlerge maıdan ashqaly jatqan eshkim joq – Dáýren Abaev
NUR-SULTAN. QazAqparat – «Ashyq dıalog» suhbatynyń kezekti sanynda Prezıdent Ákimshiligi Basshysynyń birinshi orynbasary Dáýren Abaev antıvakserler týraly pikir bildirdi, dep habarlaıdy QazAqparat tilshisi.
«Eshqandaı da «mystan aýlaý» bolmaıdy. Bul jerde áńgime túsindirý jumystaryn belsendi júrgizý týraly bolyp otyr. Túsinseńiz, antıvakserler ózderi ekpe alǵysy kelmeıtinimen qoımaı, aıtarlyqtaı agressıvti nasıhat júrgizip jatyr. Feık jańalyqtardy paıdalanyp, jalǵan medıtsınalyq faktilerdi alǵa tartýda. Ózderiniń jaqyndary men týǵandaryn ekpe alǵyzbaýǵa kóndirip, qysym jasaǵan jaıttar da az emes. Árıne mundaı jaǵdaıda olardy qasarysýshylar demeý qıyn», - dedi Dáýren Abaev.
Onyń sózine qaraǵanda, osy taqyrypqa júrgizilgen áleýmettik zertteýler vaktsınaǵa qarsy taraptyń sany sonshalyq kóp emes ekenin kórsetken.
«Sarapshylar túrli pikir aıtyp otyr. Mysaly, jabyq júrgizilgen áleýmettik saýalnamalar vaktsınatsııaǵa qarsylardyń qarasy kóp emes ekenin kórsetedi. Olardy at tóbelindeı agressıvti top dep ataýǵa bolady. Sondaı agressıvti, belsendi azǵantaı tarap passıvti kópshilikke qarsy kelip otyr degen sóz. Biraq osy azǵantaı top bir mınýt ta ózderiniń ustanymy durys ekenine kúmándanbaı, ustanymdaryn dáleldep baǵýda», - dedi Prezıdent Ákimshiligi Basshysynyń birinshi orynbasary.
Dáýren Abaev antıvakserlerdiń azaımaı turýyna aqparat dáýirinde konspırologııalyq teorııalardyń kóbeıip ketkeni de áser etip otyrǵanyn aıtady.
«Biz aqparat dáýirinde ómir súrip jatyrmyz. Eger HІH ǵasyrmen salystyrsaq, biz aqparat alatyn kózderdiń sany ol zamandaǵydan myńdaǵan, tipti on myńdaǵan ese kóbeıgen shyǵar. Kún saıyn alatyn aqparattyń kóptigi sonsha, ony óńdep, tarazylap úlgermeı jatamyz. Álemniń keskini kúrdeli, ala-qula bolyp barady. Al adam balasy bárine jaýap tapqysy keledi. Sondyqtan, sarapshylyq kózqarastarǵa súıensek, alýan túrli ózgeristerdi árbir adamǵa túsindirý kún ótken saıyn qıyndap keledi. Bul ýaqyt pen orasan kúshti qajet etedi. Mundaı adamdarda bárine jaýap tabýdyń árqashan jeńil joly bar. Ol – konspırologııa. Bul ózi álemdegi kez kelgen oqıǵany túsinidirip beretin sıqyrly dúnıe ǵoı. «Bárimizge chıp taqqysy kelip júrgen» Bıll Geıts sııaqty «zulym aǵaıǵa» bárin jaba salýǵa bolatyn bolsa, kúrdeli áleýmettik protsesterdiń ishine úńilip, saıası júıeni, ekonomıkaǵa ǵana tán qubylystardy zerdeleýdiń qajeti qansha», - dedi ol.
