Sınoptıkter Astanaǵa ne sebepti qar jaýmaı turǵanyn túsindirdi
ASTANA. KAZINFORM — Elordada bıylǵy qys ádettegiden jyly bastaldy. Aldyńǵy jyldary dál osy kezeńde aıaz kúsheıip, turaqty sýyq ornaıtyn. Osyǵan baılanysty Kazinform tilshisi Qazgıdrometke saýal joldady.
Mamandardyń aıtýynsha, qazir tek Shyǵys Qazaqstan men soltústik-shyǵys óńirlerde ǵana qar tústi. Alaıda sol aımaqtardaǵy qar bulttary Astanaǵa jete almaı tur. Buǵan sebep — óńir ústindegi antıtsıklon.
— Antıtsıklon áserinen qar jaýmaı tur. Degenmen aldaǵy kúnderi fronttardyń jyljýyna baılanysty jańbyr aralas qar jaýady. Alaıda bul tez erip ketetin qar. Al jerge jabysyp qalatyn turaqty qar jeltoqsannyń birinshi onkúndiginiń sońynda, ıaǵnı 8-9 jeltoqsanda túsýi yqtımal. Qazir baıqalyp turǵan jyly kún raıy qysqa merzimdi qubylys, — dep túsindirdi Qazgıdromet ókilderi.
Sınoptıkterdiń aıtýynsha, alańdaýǵa negiz joq. Qys jalpy alǵanda qońyrjaı jyly ótedi. Sýyq kúnder men jyly kezeńder almasyp, «temperatýralyq terbelister» baıqalady. Aıazdy kúnder de bolatyny aıtyldy.
— Jeltoqsan aıyna jasalǵan boljamǵa sáıkes, aılyq ortasha temperatýra respýblıkanyń basym bóliginde norma shamasynda bolady. Al Batys Qazaqstan, Atyraý, Mańǵystaý, Aqtóbe, Qostanaıdyń batysy, Qyzylorda jáne Ulytaýdyń batysynda temperatýra normadan 1-2 joǵary kútiledi. Shyǵys Qazaqstanda, Pavlodardyń soltústik-shyǵysynda jáne Abaı oblysynyń shyǵysyndaǵy keı aýmaqtarda, kerisinshe, normaǵa qaraǵanda 1° S tómen bolmaq, — dedi Qazgıdromet.
Jaýyn-shashyn mólsheri boıynsha da aıtarlyqtaı ózgeris joq.
— Respýblıkanyń negizgi bóliginde normaǵa jýyq, biraq Qyzylorda oblysynyń kóp bóliginde, Aqtóbeniń ońtústik-shyǵysynda, Qostanaıdyń ońtústik-batysynda jáne Ulytaýdyń batysynda normadan az túsýi múmkin. Al Pavlodar, Soltústik Qazaqstannyń shyǵys bóligi, Shyǵys Qazaqstannyń soltústigi men ortalyǵy, Abaı oblysynyń soltústik aımaqtary jáne Aqmola men Qaraǵandy oblystarynyń soltústik-shyǵys bóliginde jaýyn-shashyn mólsheri normadan kóp bolady dep kútiledi. Taýly aımaqtarda da qar molyraq túsýi yqtımal, — delingen qujatta.
Aldyn ala boljam boıynsha, jalpy qys respýblıka aýmaǵynda qalypty mólsherdegi jaýyn-shashynmen jáne salystyrmaly túrde jyly ótedi. Alaıda jekelegen kezeńderde mol qar, boran, kúshti jel, kóktaıǵaq jáne tuman sııaqty qubylystar bolýy múmkin. Qys boıy jıi jylymyq pen sýyq tolqyndary aýysyp otyrady.
Eske sala keteıik, Qazaqstannyń 16 óńirinde aýa raıyna baılanysty eskertý jarııalandy.