Antısanıtarııa, jaǵymsyz ıis: Qyzylordalyqtar mal bazaryn kóshirýdi talap etti
QYZYLORDA. KAZINFORM — Qyzylorda qalasy KBI shaǵyn aýdanynyń turǵyndary sol aýmaqta ornalasqan mal bazaryn jabýdy talap etti.
Bir top adamnyń shaǵymy Facebook áleýmettik jelisiniń «Krıtıka Qyzylorda» paraqshasynda jarııalandy.
Beınejazbada olar bazar mańy qoqysqa toly ekenin, qolqany qabatyn sasyq ıisten qutyla almaı kele jatqanyn aıtqan. Alajazdaı masa, shybyn-shirkeı qaptap, tipti kenege deıin shyǵady eken. Sondyqtan turǵyndar antısanıtarııa jaǵdaıyndaǵy saýda ornynyń jumysty jalǵastyrýyna qarsy.
Turǵyndar shaǵymyna baılanysty qala ákimdigi túsinikteme berdi. Resmı jaýaptan belgili bolǵandaı, halyqtyń renishiniń basylmaýyna birneshe sebep bar.
— Birinshiden, mal bazarynyń veterınarııalyq-sanıtarııalyq normalarǵa saı emestigi aıtylady. Ekinshiden, jeke turǵyn úılermen japsarlas ornalasqany, tórt túlik tıegen júk kólikteriniń tynyshtyqty jıi buzatyny, sonymen qatar kólik keptelisiniń kóbeıýi negiz bolǵan. Turǵyndar mal bazaryn qalanyń shetine kóshirýdi birneshe márte talap etken. Osy jaǵdaı boıynsha jumysshy top mal bazarynyń ákimshiligimen kezdesti. Máseleni egjeı-tegjeı baǵamdap, kásip mádenıetin qalyptastyrý qajettigin eskertti. Nysan ıesine talapqa sáıkes jumys jasaý keregin túsindirdi, — delingen habarlamada.
Al kóshirý múmkindigi kelesi jyly daıyn bolatyn qalanyń bas josparyna sáıkes qarastyrylady.
Aıta keteıik, Qyzylorda oblystyq Ekologııa departamentiniń qyzmetkerleri bıyl 10 aıda 46 sýbektige tekserý júrgizip, 100-ge tarta ekologııalyq zańbuzýshylyqty anyqtady.