Antyma adal qyzmet etip kelemin – qyzylordalyq polıtsııa maıory
QYZYLORDA. KAZINFORM – Qyzylordalyq Gúlnaz Sarbasova Qyzylorda qalalyq polıtsııa basqarmasy Jedel basqarý ortalyǵynyń aǵa ınspektory bolyp qyzmet etedi. Qashanda jaýapty salada eńbekqorlyǵymen kózge túsip, áriptesteri arasynda zor qoshemetke ıe bolyp otyr. Mereıli mereke qarsańynda polıtsııa maıory Gúlnaz Temirbekqyzyn áńgimege tartyp, qazirgi qyzmeti jaıynda suraǵan edik.
- Otbasynda sizdiń polıtsııa bolamyn degen maqsatyńyzǵa ata-anańyz qalaı qarady?
- Balalyq shaǵymnan ishki ister organynda qyzmet etýdi alǵa maqsat etip qoıdym. Sol armanymnyń jeteginde júrip, osy salanyń ystyǵy men sýyǵyna tózemin degen nıet tanyttym. Alǵashqyda bul armanyma ákem Temirbek qarsylyq bildirdi. Árıne, qıyndyǵy mol qyzmet qyz balaǵa qol emes dep oılaǵan bolýy kerek. Aýyr ári kúrdeli salada jumys isteý kim úshin de ońaıǵa soqpasy anyq. Alaıda men óz maqsatymnyń durys ekenine kóz jetkizdim. Ákem odan keıin batasyn berip, jumysyma sáttilik tiledi. Armanyna jetý úshin mektepti jaqsy baǵamen bitirdim. Joǵary oqý ornyna qabyldandym. Osy maqsatta Qorqyt ata atyndaǵy Qyzylorda ýnıversıtetinde bilim aldym. Joǵary bilikti maman atandym. Aldyma qoıǵan maqsatyma osylaısha qol jetkizdim.
- Eńbek jolyn qaı jerde bastadyńyz? Polıtsııa bolý qıynǵa soqqan joq pa?
- Eńbek jolymdy Jedel basqarý ortalyǵynyń ınspektory bolyp bastadym. Qazir qala kóleminde ornalasqan beınebaqylaý kamerasy arqyly quqyq buzýshylyq pen qylmysty anyqtap, der kezinde aýyzdyqtalýyna sebepshi bolyp júrmiz. Osy jyldar ishinde ishki ister salasynyń birneshe baspaldaǵymen joǵary kóterilip, antyma adal eńbek etip kelemin. Eńbegim de eleýsiz qalǵan emes. Men úshin bul mártebe ǵana emes, óte úlken jaýapkershilik ekenin ishteı túsinemin jáne oǵan saı bolýǵa qolymnan kelgenshe tyrysamyn.
- Qyzmet etken jyldarda ákeńiz aqyl-keńesin aıtty ma? Ol kisi qandaı qasıetterdi baǵalaýdy úıretti?
- «Qyz bala ákege jaqyn keledi» deıdi ǵoı. Marqum ákemniń ár sózi men úshin qaǵazǵa jazylǵan zańdaı baǵaly. Ákem meni tártipke, jaýapkershilikke, bastaǵan isti aıaǵyna deıin jetkizýge, dosqa adal bolýǵa úıretti. Alǵashynda qyz balasy úshin aýyr sanalatyn bul salada jumys isteýime qarsylyq bildirdi. Boıymdaǵy qaısarlyqty, alǵan betimnen qaıtpaıtyn tabandylyqty, jigerlilikti baıqaǵan bolý kerek, batasyn berip, osy salaǵa ózi ákeldi desem bolady. Qazirgi tańda, ishki ister salasynda júrgenime 17 jyldaı ýaqyt boldy.
Otbasynda anam ekeýi eki ul, bir qyzyn tárbıelep ósirdi. Ákem de, anam da bul salada qyzmet etken emes. Ákem Temirbek Tólebaıuly Sarbasov Aral qalasynda dúnıege kelip, zeınetker jasyna deıin sol jaqtaǵy zaýytta jumys istegen. Al, anam Dosshımova Altynaı sanaly ǵumyryn bala tárbıeleý isine arnap, balabaqshada eńbek etti. Qazirgi tańda beınettiń zeınetin kórip otyr.
- Qazir ózińiz de bir shańyraqtyń tútinin tútetip otyr ekensiz. Otbasylyq ómirde qandaı jansyz?
- Otbasynda ıbaly kelin, aıaýly anamyn. Joldasym ekeýimiz eki qyz tárbıelep otyrmyz. «Áıeldiń qyryq jany bar» deıdi ǵoı. Jumystyń aýyrtpalyǵyn kótere júrip, úı tirshiligimen aınalysýǵa ýaqyt tabamyn. Balalardyń tárbıesi men oqýyn qadaǵalaımyn. Ata-eneniń babyn taba bilý de qajet. Qudaıǵa shúkir, bir ósip-óngen áýlettiń kelinimin. Ata-enemmen birge turamyn. Osylaı jumysta abyroıly bolyp júrgenimiz osy kisilerdiń qoldaýynyń nátıjesi. Sebebi ár bastamama qoldaý bildirip, men jumysta júrsem, balalaryma qaraılap, qajettilikterin rettep otyrady. Sodan bolar, eki qyzym da atasy men ájesiniń balalary. Jumystan tys ýaqytta qolym bosaı qalsa, kúnimdi solarǵa arnap, táttilerimdi pisirip, babyn jasaýǵa tyrysamyn.
- Áńgimeńizge raqmet.
