Antıkorda krımınalıstik basqarma ashylady

ASTANA. KAZINFORM — Sybaılas jemqorlyqqa qarsy is-qımyl agenttigi qurylymynda krımınalıstik basqarma ashý usynyldy. Bul týraly jarlyqtyń jobasy «Ashyq NQA» portalynda jarııalandy. 

Antıkorǵa krımınalıstik basqarma ne úshin qajet:

— Sybaılas jemqorlyqqa qarsy qyzmettiń úshinshi tulǵalar jáne uıymdarmen qylmystyq áreketter arqyly keltiriletin aýyr zalaldy rastaıtyn tekserý aktileriniń táýelsizdigin qamtamasyz etý;
— jeke mamandardy tartýǵa bıýdjet shyǵynyn tómendetý, jedel jáne sotqa deıingi tergeý merzimin qysqartý;
— qupııa aqparattyń ashylý táýekelderin boldyrmaý.

Osy oraıda jarlyq jobasynda krımınalıstik quzyretti ákimshilik ǵımaratta ótkizý jáne obekti ishindegi rejımdi qamtamasyz etý tártibin ázirleý jáne bekitý boıynsha sybaılas jemqorlyqqa qarsy is-qımyl agenttiginiń fýnktsııasyn qarastyrý qajettigi aıtylǵan. 

— Qylmystyq-protsestik kodekstiń 80-babyna sáıkes quqyq qorǵaý nemese arnaýly memlekettik organnyń ýákiletti bólimshesiniń qyzmetkerin zertteý júrgizý jáne qorytyndy berý úshin maman retinde tartýǵa jol beriletindikten, bul usynys qylmystyq-protsestik zańnamaǵa qaıshy kelmeıdi, — delingen qujatta.

Qujat jobasy 27 jeltoqsanǵa deıin jurtshylyqtyń talqysyna usynylyp otyr. 

Buǵan deıin Antıkor keler jyldan bastap «A» korpýsyna jatatyn saıası memlekettik qyzmetshilerdiń, memlekettik ákimshilik qyzmetshilerdiń adam quqyqtary jónindegi ýákildiń, Parlament depýtattarynyń, sýdıalardyń, kvazımemlekettik sektordaǵy laýazymdy tulǵalar men olardyń jarynyń kiristeri men múlki týraly deklaratsııa qoǵamǵa ashyq jarııalanatynyn habarlady.