Antıkor jol salý kezinde jasalatyn jemqorlyqqa taldaý júrgizedi
ASTANA. KAZINFORM - Antıkor jol qurylysy salasyna jemqorlyq táýekelderi boıynsha taldaý júrgizedi
Memleket basshysynyń jol salasyndaǵy jemqorlyqty joıý jónindegi tapsyrmasyn oryndaý maqsatynda Sybaılas jemqorlyqqa qarsy is-qımyl agenttigi men Kólik mınıstrligi jol qurylysy salasyndaǵy jemqorlyq táýekelderine birlesken syrtqy taldaý júrgizedi.
Búgin qos vedomstvo basshylary Ashat Jumaǵalı men Marat Qarabaev birlesken keńeste osy taldaý barysynda sheshilýi tıis ózekti máseleler men mindetterdi talqylady.
Sońǵy 3,5 jylda Sybaılas jemqorlyqqa qarsy qyzmet 64 jemqorlyqty tirkep, 70 adamdy áshkereledi, 38 adam sottaldy.
Zalal somasy 8,8 mlrd teńgeni qurady.
Negizinen qylmystar paraqorlyq, jymqyrý, sondaı-aq laýazymdyq ókilettikterdi teris paıdalaný faktilerine baılanysty.
«Jol jumysy sapasynyń tómendigi qurylystyń barlyq kezeńderinde (bıýdjettik josparlaý, jobalaý, smetalyq josparlaý, jobalyq-smetalyq qujattamanyń memlekettik saraptamasy, tehnıkalyq qadaǵalaý, qabyldaý, paıdalanýdy baqylaý) júıeli jemqorlyq táýekelderimen baılanysty. Osyǵan oraı, Memleket basshysynyń tapsyrmalaryn oryndaý aıasynda jol salasyna bólingen barlyq qarajatty josparlaý jáne jumsaý úderisteri zerdelenip, jol qurylysynyń halyqaralyq tájirıbesin, atap aıtqanda, Gonkong, Sıngapýr, Qytaı tájirıbesin zerdeleýge erekshe nazar aýdarylady. Taldaý nátıjesi boıynsha jol qurylysynyń barlyq kezeńderinde jemqorlyq táýekelderin joıý jáne jolyn kesý kútilip otyr. Ǵylymı qaýymdastyqpen birlesip qurylystyń jańa tehnologııasyn engizý tetikteri ázirlenip usynylady", - dep atap ótti Ashat Jumaǵalı.
Kezdesý qorytyndysy boıynsha taraptar jol qurylysy salasyndaǵy qalyptasqan jaǵdaıdy ózgertý boıynsha keshendi sharalardy belgiledi.
