Antıkor jemqorlyqqa qatysty monıtorıngterdi jıi júrgizbeýi múmkin

ASTANA. QazAqparat – Sybaılas jemqorlyqqa qarsy is-qımyl agenttigi endi jemqorlyq táýekelderine qatysty monıtorıngterdi jıi júrgizbeýi múmkin. Bul týraly ashyq talqyǵa shyǵarylǵan tıisti qujatta kórsetilgen, dep habarlaıdy QazAqparat tilshisi.

Jańa ózgeristerge saı, endi jemqorlyqqa qarsy is-qımyl agenttigi men onyń aýmaqtyq bólimsheleri monıtorıng júrgizý úshin birinshi basshynyń sheshimimen qoǵamdastyq, saraptamalyq birlestik ókilderi qatarynan jumys tobyn qurýǵa quqyly bolmaq.

Qujatta kórsetilgendeı, atalǵan organ men onyń jergilikti bólimsheleri sybaılas jemqorlyqqa qarsy monıtorıngti jylyna keminde bir ret júrgizedi. Burynǵy talap boıynsha Antıkor mundaı sharalardy toqsan saıyn ótkizip turýy tıis bolatyn.

Jańa ózgertýlerge sáıkes, agenttik qajettilik týyndaǵan jaǵdaıda monıtorıngti myna tártip boıynsha júrgizedi:

- Memlekettik organdarǵa, uıymdarǵa, kvazımemlekettik sektor sýbektilerine sybaılas jemqorlyqqa qarsy is-qımyl boıynsha sybaılas jemqorlyq táýekelderin joıý, sybaılas jemqorlyqqa qarsy is-qımyl jónindegi qyzmettiń tıimdiligin arttyrý boıynsha usynymdar ázirleı otyryp, sybaılas jemqorlyqqa qarsy monıtorıng nátıjesin qalyptastyrý;

- jınalǵan aqparatty zertteý jáne taldaý;

- belgili bir qyzmet salasynda, naqty memlekettik organda, uıymda nemese kvazımemlekettik sektor sýbektisinde sybaılas jemqorlyq kórinisterine yqpal etetin máselelerdi aıqyndaý.

Jaýapty agenttik monıtorıng nátıjesi boıynsha taldamalyq esep jasap, jemqorlyq táýekelderiniń belgileri bar organdarǵa aqparat joldaıdy.

Qaýlyny ashyq talqylaý 6 jeltoqsanǵa deıin jalǵasady.