Antıkor UQK júıesinde buryn da nátıje kórsetken — Májilis depýtaty

ASTANA. KAZINFORM — Sybaılas jemqorlyqqa qarsy kúres máseleleri jekelegen qurylymdardy kúsheıtýmen emes, naqty maqsat qoıýmen jáne kúshterdi biriktirý arqyly sheshilýi kerek. Bul pikirdi Parlament Májilisiniń depýtaty Konstantın Avershın aıtty. 

Depýtattyń aıtýynsha, buǵan deıin Sybaılas jemqorlyqqa qarsy qyzmet Ulttyq qaýipsizdik komıtetiniń (UQK) júıesinde jumys istegen jáne oń nátıjesin kórsetken. Alaıda ýaqyt óte kele qyzmetter qaıtalana bastady, al bul, onyń pikirinshe, qatelik boldy.

— Qazir mańyzdy sharalar qolǵa alynyp jatyr. Bul Memleket basshysynyń tikeleı tapsyrmasymen júzege asty oılaımyn. Keńes Odaǵy ydyraǵan soń bizde sybaılas jemqorlyqtyń qaýipti deńgeıge jetkeni esimizde. Sol kezde bılik ókilderi arasyndaǵy sybaılas jemqorlyq quqyq buzýshylyqtarymen kúresetin arnaıy «S» basqarmasy qurylǵan edi. Qazirgi ózgerister soǵan uqsas qadam bolýy múmkin, — dedi Konstantın Avershın.

Ol sybaılas jemqorlyqpen kúreste naqty nátıjege qol jetkizý, ıaǵnı táýekelderdi azaıtý jáne júıelik buzýshylyqtardy joıý mańyzdy ekenin atap ótti.

— Eger maqsat «vedomstvony kúsheıtý» dep qoıylsa jáne jaı ǵana resýrstar sonda baǵyttalsa, nátıje bolmaıdy. Naqty maqsat — sybaılas jemqorlyqpen kúresý, onyń kórinisterin azaıtý bolýy kerek, — deıdi depýtat.

Sondaı-aq, spıker qazirgi formatta UQK men Antıkordyń ózara is-qımyly sınergııalyq nátıje berip, naqty nátıjege qol jetkizerine senim bildirdi.

Konstantın Avershınniń aıtýynsha, Qazaqstanda sybaılas jemqorlyq júıege, qoǵamǵa, tipti mentalıtetke deıin sińip ketken, sondyqtan onymen barlyq deńgeıde, eshkimniń bedeline qaramastan kúresý kerek.

Aıta keteıik, buǵan deıin Memleket basshysy Qasym-Jomart Toqaev memlekettik basqarý júıesin jetildirý jónindegi sharalardy bekitip, Sybaılas jemqorlyqqa qarsy qyzmetti UQK quramyna qosý týraly sheshim qabyldaǵan bolatyn.