Antıkor tóraǵasynyń eks-orynbasaryna qatysty qylmystyq is sotqa tústi

ShYMKENT. QazAqparat – Sybaılas jemqorlyqqa qarsy is-qımyl agenttigi tóraǵasynyń burynǵy orynbasary Maqsat Qojabaevqa qatysty is Shymkent qalasynyń qylmystyq ister jónindegi mamandandyrylǵan aýdanaralyq sotyna tústi. Bul týraly Shymkent sotynyń baspasóz qyzmetinen málim etti, dep habarlaıdy QazAqparat tilshisi.

Shymkent qalasynyń qylmystyq ister jónindegi mamandandyrylǵan aýdanaralyq sotyna Maqsat Qojabaev pen Zakır Gýlamovqa qatysty is kelip tústi.

«Qylmystyq istegi aıyptaý aktisine sáıkes, 2021 jyldyń 5 jeltoqsany men 2022 jyldyń 29 qańtary aralyǵynda sottalýshy M.Qojabaev aldaý jáne senimdi teris paıdalaný jolymen adamdar tobynyń aldyn ala sóz baılasýy arqyly, laýazymdy adam bola tura óziniń qyzmet babyn paıdalanyp, asa iri mólsherde bótenniń múlkin jymqyryp, QK-niń 190-baby 4-bóliginiń 2) tarmaǵynda kórsetilgen áreketterdi jasaǵan.

Sottalýshy Z. Gýlamov 2021 jyldyń 5 jeltoqsany men 2022 jyldyń 29 qańtary aralyǵynda aldaý jáne senimdi teris paıdalaný jolymen adamdar tobynyń aldyn ala sóz baılasýy arqyly, laýazymdy adam bola tura óziniń qyzmet babyn paıdalanyp, asa iri mólsherde bótenniń múlkin jymqyryp, jaýapty memlekettik laýazymdy atqaratyn tulǵaǵa asa iri mólsherde para berýge azǵyryp, QK-niń 190-baby 4-bóliginiń 2) tarmaǵynda jáne 28-babynyń 4-bóligi, 367-babynyń 4-bóliginde kórsetilgen áreketterdi jasaǵan», - delingen málimette.

Aıta keteıik, 2023 jylǵy 9 qańtarda Ulttyq qaýipsizdik komıteti sotqa deıingi tergeý aıasynda jemqorlyq quqyq buzýshylyq jasady degen kúdikpen quqyq qorǵaý organdarynyń burynǵy joǵary laýazymdy qyzmetkeri, Sybaılas jemqorlyqqa qarsy is-qımyl agenttigi tóraǵasynyń orynbasary bolǵan M.Qojabaevty ustaǵan edi.