Antıkor óz qyzmetkerine qatysty tergeý týraly túsinik berdi
NUR-SULTAN. QazAqparat – Sybaılas jemqorlyqqa qarsy is-qımyl agenttigi óz qyzmetkeriniń zańsyz is-áreketteri faktisi boıynsha qyzmettik tergeý barysy jaıly túsinik berdi, dep habarlaıdy QazAqparat atalmysh vedomostvonyń baspasóz qyzmetine silteme jasap.
Sybaılas jemqorlyqqa qarsy is-qımyl agenttigi tóraǵasynyń buıryǵyna sáıkes, Agenttiktiń jeke qaýipsizdik departamenti Qaraǵandy oblysy SJQA Jezqazǵan óńiri boıynsha Aýdanaralyq sybaılas jemqorlyqqa qarsy is-qımyl basqarmasynyń aǵa ofıtseri D.T. Kýdıkenovtiń zańsyz is-áreketteri boıynsha qyzmettik tergeý júrgizýde.
Qazirgi ýaqytta Qaraǵandy oblysy Jańaarqa aýdanynyń sotymen QR ÁQBtK-niń 608-baby 3-bóligi (mas kúıinde JKO jasaý), 611-baby 2-bóligi (JKO ornyn qaldyrý) jáne 613-baby 1-bóligi (kólik quralyn toqtatý boıynsha polıtsııa qyzmetkerleriniń zańdy talaptaryna baǵynbaý) boıynsha D.T. Kúdekenovke qatysty ákimshilik materıaldar qarastyrylýda.
2022 jylǵy 7 aqpannan bastap qazirgi ýaqytqa deıin D.T. Kýdıkenov «Pnevmonııa» dıagnozymen aýrýhanada jatyr.
Osyǵan baılanysty, «Quqyq qorǵaý qyzmeti týraly» Qazaqstan Respýblıkasy Zańynyń 58-baby 4-tarmaǵyna sáıkes D.T. Kýdıkenovke qatysty qyzmettik tergeý toqtatyldy. Ol jumysqa shyqqannan keıin qyzmettik tergeý qaıta bastalyp, D.T. Kýdıkenovke qatysty tıisti sheshim qabyldanady.
