ANTIKOR onlaın aıtysynyń jeńimpazdary anyqtaldy
NUR-SULTAN. QazAqparat - Sybaılas jemqorlyqqa qarsy is-qımyl agenttigi ótkizgen birinshi ANTIKOR onlaın aıtysynyń jeńimpazdary jarııalandy, dep habarlaıdy QazAqparat.
Jyr alamany úsh aptadan astam ýaqyt onlaın rejımde ótti. Oǵan elimizdiń ár óńirinen 16 aqyn qatysty.
«Onlaın aıtys qalaı bolady eken, halyq qalaı qabyldar eken dep oılanyp edim. Qudaıǵa shúkir, aıtys jarqyrap kórindi. Qazaq tabıǵatynan aqyn halyq. Sol aqyndyǵyn osy joly kórsetti. Meni qatty qýantqany - bizdiń aıtystyń óresi bıikteı bastaǵany. Osy aty jaman nárse tezirek ketse eken dep tileımin. Osyndaı qıyn sátte halyq úıde otyrǵanda bizdiń aıtyskerler jarq ete qaldy. Jas bolsa da, keleli oılar aıtty, halqynyń kókeıinen shyǵatyn aqyldy sózder aıtty. Men ózim rızamyn. Bul jolǵy aıtystyń ereksheligi - qatysýshylardyń baǵasyna aralasqan joqpyz, aıtystyń tóreshisi halyq boldy. Shyn júrekten ádil baǵalaryńyzǵa, qoldaýlaryńyzǵa alǵys aıtamyn», - dedi Qazylar alqasynyń tóraǵasy Myrzataı Joldasbekov ANTIKOR paraqshasynda ótken brıfıngide.
Bas júlde úshin elordalyq Bek Shymat pen shymkenttik Bekjan Bazarbek tartysqa tústi. Kórermender sheshimimen elordalyq Bek Shymat jeńiske jetip, Altyn-Orda dızaın úıiniń «Táńiri» eksklıýzıvti etno-ınstalıatsııasyn aldy. Bekjan Bazarbek birinshi orynǵa 400 000 teńge aqshalaı syılyq aldy.
Kórermenderdiń daýys berýi arqyly ekinshi orynǵa jáne 300 000 teńge aqshalaı syılyqqa Nurbol Jaýynbaev ıe boldy. Úshinshi oryn men 200 000 teńge júlde Nartaı Tileýqulǵa berildi.
Sonymen birge, Myrzataı Joldasbekov ár qatysýshyǵa óziniń segiz tomdyq shyǵarmalar jınaǵyn tartý etti.
