Antıkor: Muǵalimder 34 500 teńgeniń syılyǵyn alsa, qylmystyq jaýapkershilikke tartylady

QONAEV. QazAqparat - Sybaılas jemqorlyqqa qarsy is-qımyl agenttiginiń Almaty oblysy boıynsha departamenti muǵalimderdi syılyq alýdan bas tartýǵa shaqyryp jatyr. Ustazdar qaýymy syılyqty alǵan jaǵdaıda jazanyń qalaı bolatynyn eske salýda, dep habarlaıdy QazAqparat tilshisi.

«Jyl saıyn mektepterde sońǵy qońyraýlar, bitirý keshteri jáne muǵalimder men mektep dırektorlaryna qymbat syılyqtar tartý oryn alady. Oqýshylardyń ata-analary qosymsha shyǵyndardy kótermeýi kerek. Qazaqstanda orta bilim tegin beriledi. Barlyq mektepterde alymdarǵa qatań tyıym salynady.

Osyǵan qaramastan, Almaty oblysy boıynsha Sybaılas jemqorlyqqa qarsy qyzmetke 1424 Call-ortalyǵy arqyly mektepterdegi alymdar faktileri boıynsha 20-dan astam ótinish tústi.

Bul rette, vedomstvoda atalǵan zańsyz áreketter úshin jaýapkershilik týraly eske salynǵan»,- delingen atalǵan vedomstvonyń baspasóz qyzmetiniń habarlamasynda.

Vedomstvonyń aqparatyna sáıkes, mektep dırektorlary úshin zańsyz materıaldyq syıaqy men para alý úshin ákimshilik jáne qylmystyq jaýapkershilik qarastyrylǵan.

Ákimshilik sybaılas jemqorlyq quqyq buzýshylyq úshin jaýapkershilik sharasy – 600 AEK kólemindegi aıyppul (QR ÁQBtK 677 – baby), qylmystyq úshin – múlki tárkilene otyryp, para somasynyń 20 eselengen mólsherindegi aıyppuldan 15 jylǵa deıingi merzimge bas bostandyǵynan aıyrý kózdelgen (QR QK 366-baby).

Sondaı-aq muǵalimderge quny 10 AEK-ten (2023 jyly - 34 500 teńge) asatyn syılyqtar berýge tyıym salynady (QR AK 509-baby). Ózge jaǵdaıda 2000 AEK deıin aıyppul túrindegi qylmystyq jaýapkershilik kózdelgen (QR QK 247-baby).

Eger Siz ata-analardan nemese qyzmetkerlerden aqsha jınaý faktileri, sondaı-aq basqa da sybaılas jemqorlyq týraly bilseńiz, 1424 Call-ortalyǵyna habarlasýyńyzdy suraımyz. Azamattardyń barlyq ótinishteri mindetti túrde qaralady, qajetti sharalar qabyldanatyn bolady.