«Antıkor» men Qyzylorda oblysynyń ákimdigi 4 qurylys nysanyn baqylaýǵa aldy

QYZYLORDA. KAZINFORM – Qyzylorda oblysy boıynsha Sybaılas jemqorlyqqa qarsy qyzmet oblystyq ákimdikpen birlesip, óńirdegi belgilengen merzimde aıaqtalmaı, sozbalańǵa salynǵan 4 qurylys nysanyn preventıvtik baqylaýǵa alǵan bolatyn. Olar «Sybaılas jemqorlyq táýekelderiniń óńirlik kartasyna» engizilgen.

Bul óńirdiń áleýmettik mańyzy bar obektiler: Qazaly jáne Jańaqorǵan aýdandaryndaǵy 300 jáne 250 oryndyq eki mektep qurylysy, Aral aýdanyndaǵy dene shynyqtyrý-saýyqtyrý kesheni jáne Qazaly aýdanyndaǵy 600 oryndyq «Mádenıet úıi». 

Aıta ketý kerek, bul nysandar 2020-2021 jyldary paıdalanýǵa berilýi tıis bolatyn, alaıda merdigerdiń jumystardy belgilengen merzimde oryndamaýyna baılanysty olar keshiktirilip sozbalańǵa salynǵan. 

Atalǵan obektilerdiń árqaısysy jergilikti turǵyndar úshin óte mańyzdy sanalady.

Mysaly, Jańaqorǵan aýdany Maıbeket kentindegi mekteptiń uzaq salynýyna baılanysty 300-den astam oqýshy, 5-6 km qashyqtyqta ornalasqan kórshi aýyl mektebinde oqýǵa májbúr bolǵan. Bul mektep ár túrli sebeptermen 4 jyl boıy aıaqtalmaǵan, merdigerler aýysyp, sot daýlary jáne qaıta satyp alý protsedýralary júrgizilgen.

Qazir balalar óz kentinde bilim alyp jatyr.

Búgingi tańda barlyq nysan boıynsha qurylys-montaj jumystary tolyq aıaqtalyp, olar paıdalanýǵa berildi.