AntiKor.live: Jańa jumys ornyn ashqannan góri, baryn saqtap qalý tıimdi

NUR-SULTAN. QazAqparat - Qazirgi jaǵdaıda ár kásiporyn, ár jumys orny úshin kúresý kerek. Bul týraly «Órken» Qazaqstandyq respýblıkalyq salaaralyq yntymaqtastyq qaýymdastyǵy» zańdy tulǵalar birlestiginiń prezıdenti Bolat Omarov «AntikorLive» jobasy uıymdastyrǵan tikeleı efırde aıtty, dep habarlaıdy QazAqparat tilshisi.

«Búgingi tańda elimizdiń ekonomıkasy, álem ekonomıkasy úshin qıyn kezeń. Ekonomıkanyń barlyq salasynda úlken quldyraý boldy: bul iri kólemdi óndiriske de, jumys oryndarynyń jabylýyna da qatysty. Mundaı jaǵdaı bizdiń elde ǵana emes, búkil álemde bolyp jatyr. Jumys oryndaryn saqtap qalý maqsatynda QR Úkimeti jaǵdaıdy retteý úshin birqatar sharalar keshenin qolǵa aldy. Jańa jumys ornyn ashqannan góri, jumys ornyn saqtap qalý áldeqaıda tıimdi», - deıdi Bolat Omarov.

Ol ár kásiporyn, ár jumys orny úshin kúresý kerek ekenin aıtty. Sondaı-aq, qurylys salasyndaǵy jemqorlyq táýekelderi týraly da sóz qozǵady.

«Bul salada qyzmet etip kele jatqanyma uzaq ýaqyt boldy. Qarapaıym jumysshy bolýdan bastap, barlyq satydan óttim. Tek zań aıasynda jumys isteýge tyrystym jáne basqalarǵa da osylaı jumys isteýdi usynamyn. Jemqorlyqtyń aldyn alý – qoǵamnyń, sonyń ishinde qurylysshylardyń da máselesi. Qurylys salasy – kópqyrly protsess, qujat jumystary da kóp. Jemqorlyqtyń oryn alýy múmkin sebepter bar ekeni de sózsiz. Jer kodeksteriniń jumysyna qatysty da pysyqtaýdy qajet etetin máseleler bar», - deıdi ol.