Antıkor qyzmetkeri jemqorlyq faktisi týraly shaǵymdy qaraýǵa mindetti

NUR-SULTAN. QazAqparat – Sybaılas jemqorlyqqa qarsy qyzmet mamany jemqorlyq faktisi týraly shaǵymdy zańdy túrde qaraýǵa mindetti. Bul týraly QR Sybaılas jemqorlyqqa qarsy is-qımyl agenttiginiń tóraǵasy Oljas Bektenov aıtty, dep habarlaıdy QazAqparat tilshisi.

«Jazadan bultartpaý prınıpin eshkim alyp tastamaǵanyn atap ótkim keledi. Jáne de jemqorlyq faktisi týraly shaǵym nemese belgi túsken jaǵdaıda kez kelgen qyzmetker zańdy túrde qaralýyn jáne qabyldanatyn is-sharanyń tolyqqandy bolýyn qamtamasyz etýge mindetti. Biz jumysymyzda osy ádisti qoldanýdy bastap kettik. Óńirlik departamenttiń basshylary esep berý baıandamalary kezinde tsıfrlyq kórsetkishterdi qoldanbaıtyn bolady. Bir de bir tsıfr joq, tek shynaıy is, halyqty tolǵandyrǵan problemalardyń sheshimi, shyǵynnyń aldyn alý», - dedi Oljas Bektenov vedomstvonyń alqa otyrysynda.

Onyń paıymynsha, mundaı jańa ádis sybaılas jemqorlyqqa qarsy is-qımyl tıimdiligin aıtarlyqtaı arttyrýǵa múmkindik beredi.

«Alqa otyrysymyzdan buqaralyq aqparat quraldary habar taratatyn bolǵandyqtan barlyq azamatqa úndeý jasap, jemqorlyqqa qarsy qyzmettiń jeke quramy elimizdiń áleýmettik-ekonomıkalyq damýyna jemqorlyqtyń teris áserin tómendetý, memlekettiń ekonomıkaǵa salǵan qarajatynyń sońǵy alýshyǵa deıin jetip, qazaqstandyqtardyń ómir sapasyn arttyrýǵa qyzmet etýi úshin búkil kúsh-jigerin jumsaıtynyna sendirgim keledi», - dedi agenttik basshysy.