Antıkor qyzmeti munaı, qarjy jáne qurylys salalaryn aınalyp ótýde - sarapshy

NUR-SULTAN. QazAqparat - 2021 jyly Qazaqstan Transparency International reıtınginde sybaılas jemqorlyqty qabyldaý ındeksi (CPI) boıynsha 180-nen 102-shi orynǵa kóterildi, dep habarlaıdy QazAqparat ranking.kz saıtyna silteme jasap.

Transparency International - sybaılas jemqorlyqty zertteý jáne oǵan qarsy kúres jónindegi úkimettik emes halyqaralyq uıym. 0-den 100 balǵa deıingi shkala boıynsha 0 - sybaılas jemqorlyqtyń joǵary deńgeıi, al 100 - jemqorlyqtyń joqtyǵyn kórsetedi. Qazaqstan 37 ball jınady, bul 2020 jylmen salystyrǵanda 1 balǵa tómen.

Birden úsh el jetekshi orynǵa ıe boldy: Danııa, Fınlıandııa jáne Jańa Zelandııa, olar 88 upaı jınady. TOP-10 eldiń qataryna Norvegııa, Sıngapýr jáne Shvetsııa (85 balldan), odan keıin Shveıtsarııa (84 ball), Nıderlandy (82 ball), Lıýksembýrg (81 ball) jáne Germanııa (80 ball) kirdi.

TMD elderi arasynda Qazaqstanǵa qaraǵanda Armenııa (58-oryn jáne 49 ball) jáne Belarýs (82-oryn jáne 41 ball) pozıtsııalary jaqsy. Qalǵan elderde sybaılas jemqorlyq deńgeıi QR-ǵa qaraǵanda joǵary. Atap aıtqanda, Ýkraına 122-oryndy (32 ball), al Reseı 136-oryndy (29 ball) ıelendi. Kórshiles Ózbekstan (28 ball) jáne Qyrǵyzstan (27 ball) sáıkesinshe 140 jáne 144 orynǵa shyqty.

2021 jyly sybaılas jemqorlyqty qabyldaý ındeksi reıtınginde 11 balmen eń sońǵy 180-oryndy Ońtústik Sýdan ıelendi.

Transparency International málimetteri boıynsha, QR-da memlekettik qyzmetterdi paıdalanýshylardyń 17%-y sońǵy 12 aıda para bergen. Salystyrý úshin: Belarýste bul kórsetkish tek 15%-dy qurady, al Ýkraına men Reseıde — sáıkesinshe 23% jáne 27%.

Aıta ketý kerek, Qazaqstandaǵy sybaılas jemqorlyq qylmystarynyń sany bir jyldyń ishinde tórtten bir esege artty.

2021 jyldyń sońynda qazaqstandyqtardyń Sybaılas jemqorlyqqa qarsy qyzmetke degen senim deńgeıi shamaly bolsa da ósti: bul qyzmetke senýge bolady degen pikirmen tolyq kelisetinderdiń úlesi bir jyl ishinde 24,5%-dan 25,1%-ǵa deıin ósti, Al bul pikirmen kelispeıtinderdiń úlesi burynǵysha qaldy - 1,8%.

Transparency International atap ótýinshe, Sybaılas jemqorlyqqa qarsy is-qımyl agenttigi óz nazaryn aýyl sharýalyshyǵy jáne densaýlyq saqtaý salasyna aýdarǵan. Іri salalar, sonyń ishinde munaı-gaz, qarjy jáne qurylys salalaryna kóńil bólmeı keledi.