Antıkor Kókshetaýdaǵy sý sapasyn jaqsartý jumystaryn baqylaýǵa aldy

ASTANA. KAZINFORM – Kókshetaý qalasyndaǵy aýyz sý sapasyn jaqsartý jumystary baqylaýda tur. Bul týraly QR Sybaılas jemqorlyqqa qarsy is-qımyl agenttigi tóraǵasynyń birinshi orynbasary Ulan Sarqulov aıtty.

- Kókshetaýdaǵy sý sapasy kóńil kónshitpeıdi. Óńirlik sanıtarııalyq-epıdemıologııalyq baqylaý qyzmeti únemi osy máseleni kóterip keledi, sýdyń quramyndaǵy túrli qospalar týraly aıtyp jatyr. Bul jaǵdaı qala turǵyndarynyń densaýlyǵyna keri áser etetini anyq. Osy másele 2010 jyldan beri sheshimin tappaı keledi. Atap aıtqanda, Prezıdenttiń osy jaǵdaıǵa qatysty arnaıy tapsyrmasy bar. Sondyqtan ókiletti organdar men Sý resýrstary mınıstrligi, oblys ákimdigi osy problemamen aınalysyp jatyr dep oılaımyn. Ol jerde merdiger kompanııalar, joba somasy men smetalar jıi ózgeredi, - dedi Ulan Sarqulov Parlament Májilisinde tilshiler suraǵyna jaýap bere otyryp.

Onyń aıtýynsha, Kókshetaýdaǵy sý sapasy boıynsha Sybaılas jemqorlyqqa qarsy is-qımyl agenttigi tıisti monıtorıng jasap otyr.

Eske salsaq, birneshe jyl buryn Kókshetaý qalasynda ınvestıtsııalyq baǵdarlamalardy oryndamaǵan «Kókshetaý sý arnasy» kommýnaldyq kásipornyna iri kólemde aıyppul salyndy.