Antıkor Qazaqstannyń týrızm salasyndaǵy sybaılas jemqorlyqty tekseredi

ASTANA. KAZINFORM – Sybaılas jemqorlyqqa qarsy qyzmet «Zań men tártip» qaǵıdatyn iske asyrý boıynsha shara qabyldap jatyr.

Sybaılas jemqorlyqqa qarsy is-qımyl agenttiginde Ashat Jumaǵalıdiń tóraǵalyǵymen jeke quramnyń qatysýymen jedel májilis ótti. Memleket basshysynyń, onyń ishinde «Maqsatym – ekonomıkany jáne egemendikti nyǵaıtý» qorytyndy suhbatynda qozǵalǵan tapsyrmalar men nusqaýlardy iske asyrý máseleleri talqylandy. Eń aldymen, organ jumysynyń negizgi vektory Prezıdent jarııalaǵan «Zań jáne tártip» ıdeologııasyn keńinen engizýdi jalǵastyrý bolýǵa tıis.

Memleket basshysy atap ótkendeı, jemqorlyqqa qarsy júıeli kúres boıynsha jumysty kúsheıtý máselelerine erekshe nazar aýdaryldy. Bul baǵytta agenttiktiń túrli salalardaǵy jemqorlyq táýekelderin anyqtaý jáne joıý jónindegi qyzmeti mańyzdy quramdas bolyp qala beredi.

Májiliste bilim jáne ǵylym, jol qurylysy, sport, densaýlyq saqtaý salalaryndaǵy taldaý nátıjeleri talqylandy. Tıisti qurylymdyq jáne aýmaqtyq bólimshelerge aldaǵy jylǵa taldaý júrgizý josparlaryn qalyptastyrý jáne olardy sapaly iske asyrý týraly tapsyrmalar berildi. Máselen, agenttiktiń aldaǵy josparlarynda týrızm salasyn taldaý bar.

Zańnyń ústemdigin jáne jemqorlyq áreketteri úshin jaýapkershiliktiń bultartpastyǵyn qamtamasyz etý basym baǵyt bolyp qala beredi. Sonymen qatar el Prezıdenti óz suhbatynda obektıvti sheshimder qabyldaý qajettigin atap ótti. Osyǵan baılanysty, júrgizilip jatqan sotqa deıingi tergeý barysynda zańdylyq pen ádildik qaǵıdattaryn qamtamasyz etý jónindegi jumys jalǵasatyn bolady.

Aıta ketý kerek, ótken jyly organ qylmystyq protsess sheńberinde zańsyz ustaý, tintý, alý, is materıaldaryn burmalaý faktilerine jol bermedi. Áleýmettik ádilettilikti qalpyna keltirý maqsatynda zańsyz alynǵan aktıvterdi qaıtarý jáne zalaldy óteý mańyzdy baǵyt bolyp qala beredi.

2022 jyldan bastap agenttik 1,12 trln teńgeni qaıtarýdy qamtamasyz etti. Agenttiktiń aktıvterdi qaıtarý jónindegi jumysy, onyń ishinde halyqaralyq yntymaqtastyqty keńeıtý arqyly jalǵastyrylatyn bolady.

Agenttik halyqaralyq uıymdarmen jáne jemqorlyqqa qarsy vedomstvolarmen 14 memorandýmǵa qol qoıdy, onyń 5-i ótken jyly – Ázerbaıjan, Reseı, Gonkong, Iordanııa jáne Qatarmen.

- Sybaılas jemqorlyqqa qarsy qyzmet máselelerinde Qazaqstan aldyńǵy qatarly halyqaralyq standarttarǵa, onyń ishinde Ekonomıkalyq yntymaqtastyq jáne damý uıymy engizetin standarttarǵa baǵdarlanady. Bul óte joǵary jolaq, - dep atap ótti Memleket basshysy.

Sondyqtan agenttik otandyq zańnamaǵa jemqorlyqqa qarsy tıimdi quraldardy ımplementatsııalaýdy qamtıtyn EYDU men GREKO usynymdaryn sapaly iske asyrýdy jalǵastyratyn bolady.

Esterińizge sala keteıik, qazirgi ýaqytta Qazaqstan EYDU-nyń Sybaılas jemqorlyqqa qarsy jelisiniń Ystambul is-qımyl jospary sheńberinde monıtorıngtiń 5 raýndynan ótip jatyr.

Sarapshylar Ortalyq Azııa óńirinde jemqorlyqqa qarsy reformalardy iske asyrýdyń júıeliligi, rettiligi men josparlylyǵy boıynsha kóshbasshylyqty atap ótti. «Zań jáne tártip» ıdeologııasyn engizý boıynsha jumys talqylaýdyń jeke máselesi boldy. Onyń barysynda Agenttik qoǵamda jemqorlyqqa qarsy quqyqtyq mádenıetti qalyptastyrý boıynsha keshendi sharalar qabyldap jatyr.

Qoǵamdyq pikir kóshbasshylarynyń qatysýymen 900 myńnan astam azamatty qamtı otyryp, ártúrli formattaǵy 7,5 myńǵa jýyq is-shara ótkizildi, «Halyq zańgeri» jobasy aıasynda 150 myń azamatqa keńes berildi, 50 myńnan astam memlekettik qyzmetshi jemqorlyqqa qarsy oqytýdan ótti.

Keńes qorytyndysy boıynsha jemqorlyqqa qarsy kúrestiń tıimdiligin arttyrý, zań ústemdigin nyǵaıtý jáne quqyqtyq tártipti qamtamasyz etý boıynsha naqty tapsyrmalar berildi.

Memleket basshysynyń tapsyrmalaryn oryndaý sheńberinde agenttik azamattardyń ál-aýqatyn arttyrý maqsatynda jemqorlyqty joıý jónindegi jumysty jalǵastyrady.

Abaı oblysynda 9-synyp oqýshysy sybaılas jemqorlyqqa qarsy oıyn jasap shyǵarǵanyn jazǵan bolatynbyz.