Antıkor Qaraǵandy oblysynda aqaýlary bar nysandardy paıdalanýǵa berý faktilerin anyqtady

ASTANA. KAZINFORM – Bul týraly QR sybaılas jemqorlyqqa qarsy is-qımyl agenttiginiń baspasóz qyzmetinen málim boldy.

Baspasóz qyzmetiniń málimetterine qaraǵanda, Qaraǵandy oblysynda avtomobıl joldaryn salý jáne jóndeý monıtorıngi barysynda aqaýlary bola tura obektilerdi paıdalanýǵa berý faktileri anyqtaldy.

Máselen, ákimdik «Qaraǵandy – Shahtınsk – Esengeldi – Qaınar – Nura» jolynda jóndeý jumystaryn qabyldaǵan, olar boıynsha Jol aktıvteriniń sapasy ulttyq ortalyǵynyń fılıalynda jol jamylǵysy boıynsha eskertýler bolǵan.

Mundaı faktilerdi boldyrmaý úshin Antıkor tapsyrys berýshi men merdigerdiń jol sapasy saraptamasynyń nátıjeleri boıynsha anyqtalǵan buzýshylyqtardy joıý mindetin zańnamalyq turǵydan bekitýdi usyndy.

Sonymen qatar, yqtımal aqaýlardy boldyrmaý úshin arnaıy qurylǵan monıtorıngtik top júrgiziletin jol jumystarynyń sapasyn zerttedi (monıtorıng oblystyń 8 jolynda, onyń ishinde «Qaraǵandy-Balqash» – 362 km, «Balqash – Býrylbaıtal» – 50 km).

Mysaly, «Qaraǵandy-Balqash» jolyn qaıta jańartý kezinde memlekettik standartqa sáıkes kelmeıtin qıyrshyq tasty qoldanýǵa jol berilmedi. Merdigerdiń esebinen qurylys materıaly aýystyryldy.

Kúsheıtilgen baqylaý 2024 jyldyń sońyna qaraı osy uzaq qurylystyń ýaqtyly aıaqtalýyna yqpal etti.
Maýsym bastalysymen jol jumystarynyń barysyna monıtorıng jalǵasatyn bolady.

- Sybaılas jemqorlyqqa qarsy qyzmet jáne onyń aýmaqtyq bólimsheleri sybaılas jemqorlyq táýekelderin joıý jáne jol salasyndaǵy zańdylyqty qamtamasyz etý boıynsha jumysty jalǵastyrýda, - delingen habarlamada.

Osyǵan deıin qurylyspen aınalysýǵa ruqsat alǵan kompanııalardyń bári tekserýden ótýi múmkin ekeni týraly jazdyq.