Antıkor Eýropa Keńesimen birlesip aktıvterdi qaıtarý máselesin talqylady
Konferentsııaǵa Eýropa jáne Ortalyq Azııa quqyq qorǵaý organdarynyń ókilderi, sondaı-aq Eýropa Keńesiniń sarapshylary qatysty.
Agenttik Tóraǵasynyń orynbasary Ashat Jumaǵalı óz sózinde aktıvterdi qaıtarý máselesi Memleket basshysynyń erekshe baqylaýynda ekenin, onyń tapsyrmasy boıynsha aǵymdaǵy jyldyń 5 maýsymynda ekonomıkalyq resýrstardyń zańsyz shoǵyrlanýyna qarsy is-qımyl máseleleri jónindegi vedomstvoaralyq komıssııa qurylǵanyn atap ótti.
Konferentsııaǵa qatysýshylar aktıvterdi qaıtarýdyń oń tájirıbesimen bólisip, praktıkalyq máseleler men tıisti quqyqtyq bazany talqylady. Negizgi nazar shıelenisti máselelerge jáne olardy qalaı sheshýge baǵyttaldy.
Aktıvterdi qaıtarý boıynsha Sybaılas jemqorlyqqa qarsy qyzmet óz kózqarasyn bildirip, onyń quramynda qarjylyq tergeý, aktıvterdi izdeý jáne qaıtarý basqarmasy quryldy.
Arnaıy qurylǵan bólimsheniń qyzmeti jeke jáne zańdy tulǵalardy zańsyz baıytý faktilerin, aqsha men basqa da qundylyqtardy alý kózderin, múliktiń, onyń ishinde tyıym salynǵan múliktiń naqty tıesiligin, sondaı-aq olardyń quqyqqa qarsy quraldarǵa qatystylyǵyn anyqtaýǵa baǵyttalǵan.
Aǵymdaǵy jyly Agenttik qabyldaǵan sharalarmen jalpy somasy 500 mlrd teńgege jýyq aktıvterdi memleketke qaıtarý qamtamasyz etildi. Bul baǵyttaǵy jumystar jalǵasýda.
Osyǵan baılanysty, Qarjylyq monıtorıng agenttiginiń qarjylyq barlaý bólimshesimen, Qazaqstannyń Bas prokýratýrasymen tyǵyz ózara is-qımyl jolǵa qoıylyp, «Egmont», «Karın», «Arın», «OSINT», basqa da resmı jáne beıresmı baılanys arnalarynyń múmkindikteri paıdalanylýda.
Eki kúndik konferentsııa barysynda is-sharaǵa qatysýshylar tárkilengen aktıvterdi tikeleı qaıtarýǵa múmkindik beretin quqyqtyq ınstıtýtsıonaldyq negizderdi ázirleý, ártúrli ıýrısdıktsııalardaǵy qatyrý jáne alý praktıkasy, aktıvterdi qaıtarý máseleleri, sondaı-aq aqparat almasýdyń resmı jáne beıresmı jelilerin paıdalaný máselelerin talqylady.
