Antıkor: eki jylda 1,1 trln teńgeniń zańsyz aktıvteri qaıtaryldy
ASTANA. KAZINFORM – QR Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov sońǵy eki jylda elimizge qansha teńgeniń zańsyz aktıvi qaıtarylǵanyn aıtty.
— Agenttik 2022 jyldan bastap memleket pen kvazımemlekettik sektor sýbektilerine 1 trln 100 mlrd teńgeden astam somanyń múliktik aktıvteri men qarajatty qaıtarýdy qamtamasyz etti, onyń 321,6 mlrd teńgesi tikeleı bıýdjetke óteldi. Qaıtarylǵan aktıvterge ákimshilik ǵımarattar, eksklıýzıvti zergerlik buıymdar, lıýks úıler, páterler men avtokólikter, kompanııalardaǵy úlester men aktsııalar, temirjol relsteri men qorlar, sonyń ishinde shetelden alynǵan qarajat kiredi, — dedi resmı.
Onyń aıtýynsha, memleketke qaıtarylǵan barlyq aktıvter áleýmettik maqsatta paıdalanýǵa baǵyttalýda.
Bıyl birneshe nysan, sonyń ishinde Almatydaǵy quny 7,9 mlrd teńgeden asatyn «Kaisar Tower» bıznes ortalyǵy ǵımaraty Qazaq ulttyq áıelder pedagogıkasy ýnıversıtetine paıdalanýǵa berildi.
T.Júrgenov atyndaǵy «Qazaq ulttyq óner akademııasy» RMÝ balansyna quny 800 mln teńgeden asatyn ákimshilik ǵımarat aýdaryldy.
Elordada quny 5 mıllıard teńgeden asatyn úsh záýlim úı Astana qalasy ákimdiginiń «Múmkindigi shekteýli balalarǵa arnalǵan psıhologııalyq-pedagogıkalyq túzetý basqarmasy» KMM-ge berildi. Bul bilim berý jaǵdaıyn aıtarlyqtaı jaqsartyp, shyǵarmashylyq bastamalardy damytýǵa qoldaý kórsetedi.
Sándi múlikterdiń biri — Aqmola oblysynyń Varap aýylyndaǵy jalpy aýdany 1,5 myń sharshy metr rezıdentsııa 135 gektar jer ýchaskesimen birge Astananyń Bilim basqarmasyna berildi, — dedi Danııar Bıgaıdarov.
Aıta keteıik, buǵan deıin Astanada para alyp, balabaqsha ornyn saýdaǵa salǵan sheneýnik ustalǵanyn habarlaǵan edik.