Antıkor birqatar uıymdasqan qylmystyq top pen jemqorlyqtyń 49 júıeli faktisin anyqtady
ASTANA. KAZINFORM – Aǵymdaǵy jyly qylmystyq quqyq buzýshylyqtardyń jalpy sanynan júıeli jemqorlyqtyń 49 faktisi anyqtaldy, 212 adam áshkerelendi. Bul týraly agenttiktiń baspasóz qyzmeti málim etti.
«Agenttik QR TJM Órtke qarsy qyzmetiniń tóraǵasyna, Shymkent qalasy jáne Jetisý oblysy TJD bastyqtaryna qatysty tergeýdi aıaqtady. Laýazymdy tulǵalar jalpy somasy 40 mln teńgeden astam bıznes ókilinen júıeli negizde para aldy degen kúdikke ilinip otyr», — delingen habarlamada.
Tergeý soty kúdikti adamdarǵa qatysty qamaýda ustaý túrindegi bultartpaý sharasyna sanktsııa berdi.
Málim bolǵandaı, eki uıymdasqan qylmystyq toptyń qylmystyq áreketi toqtatylǵan.
Pavlodar oblysynda «Ertis Ormany» memlekettik orman tabıǵı rezervatynyń laýazymdy tulǵalaryna qatysty qylmystyq is boıynsha sotqa deıingi tergeý aıaqtaldy.
«Kúdiktiler asa iri mólsherde bıýdjet qarajatyn jymqyrýmen jáne laýazymdyq ókilettikterin teris paıdalanýmen baılanysty uıymdasqan qylmystyq top qurý jáne oǵan qatysý boıynsha aıyptaldy. Sharbaqty aýdanynyń aýmaǵynda „Ertis Ormany“ memlekettik orman tabıǵı rezervatynyń bas dırektory bastaǵan uıymdasqan qylmystyq top 2022 jyldyń sáýiri men 2023 jyldyń jeltoqsany aralyǵynda tehnologııalyq jáne otyn aǵashtary túrindegi iskerlik súrekti zańsyz satý arqyly shamamen 153 mln teńge somaǵa orman urlaǵan», — dep habarlady agenttiktiń baspasóz qyzmeti.
Uıymdasqan qylmystyq toptyń qatysýshylary sottyń sanktsııasymen qamaýǵa alyndy.
Osyǵan uqsas qylmystar úshin buryn «Semeı Ormany» basshylyǵy sottalǵan bolatyn.
Atalǵan qylmystardyń jasalý sebepterin taldaý kórsetkendeı, turaqty jemqorlyq shemalary jolyn kesý úshin júıeli jáne keshendi sharalar qabyldaý qajet.
Agenttik beıindi mınıstrliktiń atyna tıisti usynys joldady.
«Túrkistan oblysynda bilim berý salasynda jemqorlyq áreketteri úshin uıymdasqan qylmystyq toptyń qyzmeti toqtatyldy. Shardara aýdanynyń bilim bóliminiń laýazymdy tulǵalaryna qatysty uıymdasqan qylmystyq top qurý jáne oǵan bıýdjet qarajatyn jymqyrý maqsatynda qatysý faktisi boıynsha sotqa deıingi tergeý júrgizilip jatyr», — delingen habarlamada.
12 qatysýshydan turatyn turaqty qylmystyq top bilim berý salasynda naqty jumys istemegen jeke tulǵalarǵa, sondaı-aq ózderiniń jeke shottaryna jalaqy aýdarý arqyly 2020-2023 jyldar kezeńinde júıeli negizde bıýdjet qarajatyn jymqyrdy dep kúdiktenedi.
Qylmystyq áreketter nátıjesinde memleketke 3,7 mlrd teńge kóleminde zalal keltirildi.
Sotqa deıingi tergeý jalǵasyp jatyr.
Jetisý oblysynda Sybaılas jemqorlyqqa qarsy qyzmet uıymdasqan qylmystyq top qurý jáne bıýdjet qarajatyn jymqyrý maqsatynda oǵan qatysý faktisi boıynsha Taldyqorǵan qalasynyń bilim bóliminiń laýazymdy tulǵalaryna qatysty tergeýdi aıaqtady.
Turaqty uıymdasqan qylmystyq top 2020 jylǵy qańtar men 2023 jylǵy naýryz aralyǵynda Taldyqorǵan qalasynyń aýmaǵynda 13 qatysýshydan turatyn adamdar toby quqyqqa qarsy is-árekettermen aınalysqan.
Olar júıeli túrde bilim berý salasynda naqty jumys istemegen jeke tulǵalarǵa, sondaı-aq ózderiniń jeke shottaryna jalaqy aýdarý arqyly bıýdjet qarajatyn jymqyrǵan.
Qylmystyq áreketterdiń nátıjesinde memleketke 4,3 mlrd teńge kóleminde zalal keltirildi.
Qazirgi ýaqytta qylmystyq is sotqa jiberildi.
Sonymen qatar, 460-tan astam avtokólikti zańsyz esepke qoıýmen aınalysqan UQT múshelerine — elordalyq Mamandandyrylǵan HQKO qyzmetkerlerine, polıtsııa qyzmetkerlerine jáne azamattyq tulǵalarǵa (12 adam 3,5 jyldan 9 jylǵa deıin bas bostandyǵynan aıyryldy, 3 adam 2,5 jylǵa bas bostandyǵynan aıyryldy) qatysty úkim shyǵaryldy.
Memleketke keltirgen jalpy shyǵyn 1,2 mlrd teńgeni qurady.
Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.
