Antıkor bilim salasynda jemqorlyq faktisi jıi tirkeletin óńirlerdi atady

ASTANA. KAZINFORM – 2023 jyldyń basynan beri bilim berý salasynda jemqorlyq faktileri boıynsha 287 qylmystyq is tirkeldi. Bilim berý salasyndaǵy jemqorlyq bylyqtar týraly tolyǵyraq Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov aıtyp berdi. 

«Qarjy jymqyrýdyń eń kóp somasy Jetisý, Túrkistan, Qyzylorda, Almaty, Aqtóbe oblystary men Almaty qalasynda anyqtaldy. Jemqorlyq qylmys jasaǵan 386 adam áshkerelenip, onyń ishinde 207 adam sottaldy», - dedi Danııar Bıgaıdarov agenttikte ótken baspasóz máslıhatynda.

Sondaı-aq, Antıkordyń resmı ókili Qyzylorda oblysy Jańaqorǵan aýdany bilim bóliminiń burynǵy basshysy men onyń qaramaǵyndaǵylarǵa (bas býhgalter, bas ekonomıst jáne 24 mekteptiń býhgalteri) qatysty sotqa deıingi tergeý aıaqtalǵanyn aıtty.

«Olar mektepterde is júzinde eńbek qyzmetin júzege asyrmaǵan adamdarǵa jalaqy aýdarý arqyly 213 mln teńge somasynda bıýdjet qarajatyn jymqyrǵan dep aıyptalýda. Budan basqa, Bilim bóliminiń bas býhgalteri qylmystyq jolmen alynǵan 6,5 mln teńge somasyndaǵy aqshalaı qarajatty zańdastyrdy degen kúdikke ilindi. Qazirgi ýaqytta qylmystyq is sotqa jiberildi», - deıdi ol.

Odan bólek, brıfıng barysynda Taraz qalasy Polıtehnıkalyq kolledjiniń dırektoryna qatysty sotqa deıingi tergeýdiń aıaqtalǵany belgili boldy.

«Kolledj dırektoryna «Baǵdarlamalyq qamtamasyz etý» mamandyǵy boıynsha talapkerge jalpy bilim berý grantyn berýge kómekteskeni úshin para aldy degen aıyp taǵyldy. Qylmystyq is materıaldary sotqa joldandy», - dep tolyqtyrdy spıker.

Eske sala ketsek, ótken jyly da bilim salasynda jemqorlyq faktileriniń kóptigi aıtylǵan edi.

Osyǵan baılanysty Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı men Oqý-aǵartý mınıstri Ǵanı Beısembaev orta bilim berýdi qarjylandyrýdaǵy sybaılas jemqorlyq qaterlerine birlesken taldaý júrgizýge ýaǵdalasty.