Antıkor bızneske zańsyz aralasýdyń 72 deregin anyqtady

ASTANA. QazAqparat - Sybaılas jemqorlyqqa qarsy is-qımyl agenttigi tóraǵasynyń orynbasary Ashat Jumaǵalıdiń basshylyǵymen Sybaılas jemqorlyqqa qarsy qyzmet jumys tobynyń jáne «Atameken» Ulttyq palatasynyń kezekti keńeıtilgen otyrysy ótti, dep habarlaıdy QazAqparat.

Jıynda kásipkerlerdiń ózekti jáne problemalyq ótinishteri qaralyp, top jumysynyń aldyn ala qorytyndylary shyǵaryldy, sondaı-aq, aldaǵy kezeńge arnalǵan josparlar men mindetter aıqyndaldy.

Aýmaqtyq departamentterdiń qylmystyq isteri boıynsha bıznestiń qatysýymen tergeý áreketteri edáýir qysqartyldy, bul - agenttik engizgen vedomstvolyq baqylaý tetiginiń nátıjesi.

Bıznespen myńnan astam tergeý áreketterin júrgizýge jol berilmedi, bul kásipkerlerdi tergeý kabınetterine barýǵa, is júrgizý sharalaryna qatysýǵa artyq ýaqyt jumsaýdyń aldyn alady. Sonymen qatar, sybaılas jemqorlyqqa qarsy qyzmet memlekettik qyzmetshiler tarapynan zańsyz aralasý jáne bızneske qysym jasaý faktilerin anyqtaý boıynsha júıeli jumys júrgizýde.

Jyl basynan beri osyndaı 72 fakt anyqtaldy, olar boıynsha 165 sotqa deıingi tergeý bastaldy, 112 laýazymdy tulǵa áshkerelendi, onyń 65-i sottaldy.

Zańsyz áreketterdiń kópshiligi para alýmen baılanysty, sonyń ishinde oryndalǵan jumystardyń aktilerine qol qoıý, ruqsat qujattaryn berý jáne basqalary jatady. Olardyń jalpy qurylymdaǵy úles salmaǵy 80% qurady.

Sybaılas jemqorlyqqa qarsy qyzmettiń tergeýshileri joǵaryda kórsetilgen barlyq faktiler boıynsha memlekettik organdar basshylyǵynyń atyna sybaılas jemqorlyq qylmystar jasaýǵa yqpal etken mán-jaılardy joıý jóninde usynystar engizdi.