Antıkor Baıanaýylda zańsyz salynyp jatqan kottedjder qalashyǵynyń qurylysyn toqtatty
PAVLODAR. KAZINFORM - Atalǵan jer ýchaskesin Baıanaýyl kentiniń ákimdigi 2019 jyly aýktsıonǵa qoıyp, jeke tulǵaǵa bes jarym jylǵa ýaqytsha paıdalanýǵa satqan. Alaıda jer paıdalanýshyda qurylysqa ruqsat beretin qujattar bolmaı shyqty.
Sybaılas jemqorlyqqa qarsy is-qımyl agenttiniń Pavlodar oblysy boıynsha departamentiniń volonterleri Baıanaýyl ulttyq parkine jaqyn mańda zańsyz salynyp jatqan qurylysty anyqtady. Jeke tulǵa bul jerde kottedjder qalashyǵyn turǵyzýdy josparlaǵan.
«Monıtorıng júrgizý barysynda Baıanaýyl kentinde aýmaǵy 0,4 gektar jerde kottedjder qurylysy júrip jatqany anyqtaldy. Jergilikti ákimdiktiń aqparatynsha, bul jer ýchaskesi 2019 jyly aýktsıonǵa qoıylyp, jeke tulǵaǵa ýaqytsha óteýli jer paıdalaný quqyǵymen bes jarym jylǵa satylǵan. Alaıda jer paıdalanýshy kottedjder qurylysyn bastaýǵa ruqsat beretin qujattar boıynsha jergilikti ókiletti memlekettik organnyń kelisimin almaǵan», dep habarlady óńirlik antıkor qyzmetinen.
Baıanaýyl aýdandyq ekonomıkanyń naqty sektory bólimine atalǵan qurylysty toqtatý týraly habarlama jiberilgen. Al aýdandyq jer qatynastary bólimi jer ýchaskesin jalǵa alý shartyn buzý boıynsha jumystardy bastap ketti. Atalǵan aýmaq kent turǵyndary serýen quratyn, mádenı jáne sporttyq is-sharalar ótkizetin jer bolǵan.
