«Antıkor-aıtystyń» jeńimpazy osy aptada anyqtalady
Aıtysker aqyndar onlaın juptalyp birden, daıyndyqsyz shynaıy ári onlaın rejımde sýyryp salma ónerin pash etedi. Baıqaýdyń taǵy bir ereksheligi – saıys sybaılas jemqorlyqqa qarsy taqyrypqa arnalady. 16 aqyn sóz dodasynyń alǵashqy aınalymynan ótip te qoıǵan.
«Qazaqtyń salt-sanasyna, bolmysyna jat dert qadaldy. Ol – jemqorlyq derti. Maqsat – jalǵyz agenttiktiń kúshimen ǵana tosqaýyl bolý emes, jemqorlyqpen kúresti ulttyq qozǵalysqa aınaldyrý, ár qazaqstandyqtyń boıynda jemqorlyqqa qarsy mádenıetti qalyptastyrý. «Antıkor-aıtys» jobasyn bastap, qazir áleýmettik jelide halyqtyń alǵysyn alyp jatyrmyz. «Úıde otyrǵanda rýhymyzdy asqaqtatyp, eńsemizdi kótergen erekshe shara boldy» dep rahmetin aıtýda», - deıdi Yrza Tursynzada.
Aıtys 9 sáýirde bastaldy. Qatysýshylar boıynsha jerebe tartylyp, juptar anyqtaldy. 19 sáýirge deıin 1/8, 1/4 jáne 1/2 fınaldary ótedi. Onlaın-aıtystyń fınaly bıylǵy 18 jáne 19 sáýirge josparlanǵan.
Jeńimpazdar «Antisor_shtab_kz» Telegram-arnasynda onlaın-daýys berý jáne memleket jáne qoǵam qaıratkeri Myrzataı Joldasbekovtyń tóraǵalyq etýimen qazylar alqasynyń arasynda daýysty paıyzdyq qatynasta bólý arqyly anyqtalady.
Al agenttiktiń aqparattyq-aǵartýshylyq shtabynyń múshesi, Danııar Aldabergenniń aıtýynsha, jastar qazir jemqorlyqpen kúres taqyrybynda qoǵamnyń problemasyn kóterip jatyr.
«Tóle bı on úshinde tórelik aıtqan, Qazybek bı on besinde daý sheshken degendi jıi estımiz. Ol kezde de daý sheshetin basqa adamdar da bolǵan shyǵar. Biraq jastardyń sol kezde el isine aralasyp, aıtqan pikiri súıkimdirek bolǵan. Mysaly úlken er azamattyń boıyndaǵy jaman minezin jasy kishi nemese balasymen jasty adam aıtsa onda ol uıalyp, tyıylýǵa áreket etedi. Sol sekildi jemqorlyq taqyrybyn tekten-tekke alǵan joqpyz», - deıdi ol.